ଶୀତ

କାକର ଟୋପାଏ ଫୁଲ ପାଖୁଡ଼ାରେ

ଆଖିକୁ ଲାଗଇ ହୀରା

ଏମିତି ଶୀତରେ ଜାନୁଆରୀ ଆସି

ଆର ବାଟେ ଦେଲେ ଧରା ।

ଗେଣ୍ଡୁଫୁଲ ମାସ ପଣ୍ଡୁ ପୂନେଇଁରେ

ଫେରିବାକୁ ବାଟ ଖୋଜେ

କେଉଁ ଦେଉଳରେ କୂଆଁରା ହେମନ୍ତ

କଳା ପଥରକୁ ପୂଜେ ।

ବନ ଝରଣାର ଗାଉଣା ସରୁନି

ଦିନ ଛୋଟ ହୁଏ ଜାଣ

ଶୀତଳ ସେଜରେ ବାକି କଥା କହି

ରାତିରେ ଖାଉଛି ରାଣ ।

ଖତରା କ୍ଷେତର ନିଗିଢା ନଈର

ପାଣି ବହେ ଧାରେ ଗଙ୍ଗା

ଦୂର ଦରିଆର ଦୀପକୁ ଛୁଇଁବ

କାର୍ତ୍ତିକ ଶେଷରେ ଡଙ୍ଗା ।

ସାବନୀ ବୋହୂଟି ସରୁ ଆଙ୍ଗୁଳିରେ

ଆଙ୍କିଲା ପଦୁଅଁ ପାଦ

ଶିରି ପବନର ପାହାନ୍ତି ପହରୁ

ଶୁଭେ ହୁଳହୁଳି ଶବ୍ଦ ।

ରାତି ରହିଯାଏ କଜଳ କଳାରେ

ସୁନେଲି ଘାସର ସଞ୍ଜ

କୁହୁଡି ଚାଦର ଆଉଜା ସକାଳ

ଦିନରେ ଚମକେ କୁଞ୍ଜ ।।