ଶୀତ ସକାଳ

ଶୀତ ସକାଳ

ଶୀତ ସକାଳ ଲାଗେ ଅତି ଆପଣାର ।

ସବୁଜ ଗାଲିଚା ପରେ ଭିଜା କାକର ॥

ଡାକୁ ଥାଏ ଡାଲେ ପିକ ।

ମନରୁ ହରେ ସଂତାପ ।

ମୁକ୍ତା ଝରା ଖରା ତାର ଦେହ ପାଇଁ ବଡ ହିତ ॥0॥

ପାହାଡର ଚୂଡା ଛୁଇଁ ସୁରୁଜ ଆସନ୍ତି ଉଇଁ ।

ପାହାଡୀ ଝରଣାଟିଏ ଯାଉଥାଏ ଡେଇଁଡେଇଁ ।।

ବନାନୀର ଆର ପାରେ

ସବୁଜିମା କ୍ଷେତ ଭୁଇଁ

ଶୀତ ଦେହ ଖୋଜୁ ଥାଏ ଟିକେ ଖରା ଟିକେ ଛାଇ ॥୧॥

ଦୂରେ କାହିଁ ଦେଖା ଦିଏ ଦି’ ଧାଡିଆ ଗାଁ ଟିଏ ।

ସାପ ଭଳି ଲମ୍ବି ଥାଏ, ତା ପାଖରେ ନଈ ଟିଏ ॥

ଶାଗଡିଆ ଚାଲିଥାଏ

ଦଣ୍ଡନାଚ ଗୀତ ଗାଇ

ବଳଦ ବେକ ଘୁଙ୍ଗୁର ବାଜୁଥାଏ ତାଳ ଦେଇ ॥୨॥

ସୁନା କ୍ଷେତ ହସୁଥାଏ ଚାଷୀ ଭାଇ ଖୁସି ହୁଏ ।

ଗାଁ ଫୁଲ ବଗିଚାରେ ଶୀତ ଲୁଚକାଳୀ ଖେଳେ ॥

କିଏ ଫୁଲ ତୋଳୁ ଥାଏ

କିଏ ନିଆଁ ପୋଇ ହୁଏ

ଶୀତ ଥୁରୁ ଥୁରୁ ହାତେ ଧାନ କେଣ୍ଡା ନାଚୁ ଥାଏ ॥୩॥

***