ଶଗଡ ଉପରେ ମାଙ୍କଡ

ଗଡି ଗଡି ଯାଏ ଶଗଡ ଗାଡି

       ଶଗଡ ଉପରେ ମାଙ୍କଡ ଚଢି

ଖେଁ ଖେଁ ହସେ ମୁହଁକୁ ମୋଡି

     ଲୋକ ଚାହିଁଛନ୍ତି ଧାଡି କି ଧାଡି ।।

ଶଗଡ ଚାଲଇ କେଁ କଟର

       ବିଲୁଆ ନନାଟି ବଡ ଚତୁର

ଗହିରୀ ବିଲରେ କରେ ବିଚାର

      ହୁକେ ହୋ ଡାକ ବଡ ମଧୁର ।।

ଟପ ଟପ ପଡେ ବରଷା ପାଣି

     ସାରୁଗଛ ମୂଳେ ବେଙ୍ଗୁଲୀ ନାନୀ

ମୁହଁ ରେ ଲାଜ ତା' ଭାରି ସିଆଣୀ 

     ସତେ କି ଲାଗେ ସେ ବନ ହରିଣୀ ।।

କା' କା' ରାବେ ଡାମରା କାଉ 

     ପାହିଲାଣି ରାତି ଅଳସ ଥାଉ

ଉଠ ଉଠ ମଠ ନକର ଆଉ

     ପହିଲି କିରଣ ଦେହକୁ ଯାଉ ।।

ପୁଷି ମାଉସୀ ଲୋ ପୁଷି ମାଉସୀ 

        ଆଖି ମଟମଟ କରୁଥା ବସି

ମାଛ ତରକାରୀ ସୁଆଦ ବେଶୀ

        ଅନାଇ ବସିଛୁ ଖାଇବୁ ହସି  ।।

ଟୁଉକୁ ମୂଷିରେ ଟୁକେଇ ମୂଷି

      ଧାନ ଭରଣକ ଖାଉଥା ବସି

ଝରାନା ଲୁହ ତୁ ହେଉଥା ଖୁସି      

      ହସୁଥା ତୁ ମୁଁ ଯାଉଛି ଋଷି  ।।