ଶେଷ ପିଢ଼ି ଲୋକ

ଆମେ ବୋଧହୁଏ ଶେଷ ପୀଢ଼ିଲୋକ

     ଏଇ ଧାରାଣା ହୋଇଛି

  ନଡା ଛପରର ମାଟି ଘରେ ବଢି

     ବାଳୁତ ସମୟ ବିତିଛି || 1||

ଅଜା ଆଈ ଜେଜେ ବାପା ମାଆଠାରୁ

     ଭୁତ ପ୍ରେତ ଗପ ଶୁଣିଛୁ

 ପରୀ ରାଇଜର ରାଜକୁମାରୀ ତ

     ବୁଢ଼ୀ ଅସୁରୁଣୀ ରହିଛି || 2||

ଗିନା ଥାଳିଆରେ ତାଙ୍କ ଠାରୁ ମାଗି

     ଟିକେ ନାଲି ଚା ପିଇଛୁ

 ଗାଆଁ ଦାଣ୍ଡରେ  ବାହିକି ମାଙ୍କଡ

    କବାଡି ଓ ନଟୁ ଖେଲିଛୁ ||3||

 ଅବା ବୋହୁଚୋରି ଅବା କିତିକିତି

    ଖେଳେ ସମୟ ସାରିଛୁ

କଉଡ଼ି ପଥର ଫୋପଡ଼ା ଫୋପାଡ଼ି

    କଳି ଗୋଳରେ ମାତିଛୁ ||4||

  ଡିବିରି ଲଣ୍ଠନ ମିଞ୍ଜି ଆଲୁଅରେ

    ପାଖେ ବସି ପାଠ ପଢ଼ିଛେ

  କାଚ ଭାଙ୍ଗିଗଲେ ରସୁଣର ଅଠା

    ଲଗାଇ ତାହା ଯୋଡ଼ିଛେ ||5||

  ଦୂର ସମ୍ପର୍କୀୟ ଲୋକଙ୍କ ଖବର

     ଜାଣିବାକୁ ଚିଠି ଲେଖିଛେ

ପୋଷ୍ଟ କାର୍ଡ ଖଣ୍ଡେ ପୋଷ୍ଟ କରିଦେଇ

     ଉତ୍ତରକୁ ଚାହିଁ ବସିଛେ ||6||

  ବହୁ ସମୟରେ ପୋଷ୍ଟ ପିଅନଠୁ

      ମନି ଅର୍ଡର ଯେ ରଖିଛୁ

   ଟଙ୍କା ଗଣିଗଣି ଚଳିବା ପାଇଁକି

    ଶପଥରେ ଟାଣ ହୋଇଛୁ ||7||

ଆମେ ବୋଧହୁଏ ଶେଷପିଢ଼ି ଲୋକ

    ଶିକ୍ଷକ ଠୁ ମାଡ ଖାଇଛୁ

 ଏ କଥାକୁ ଘରେ କହି ଦେଲେ ପୁଣି

   ବାପା ମାଆ ଗାଳି ଶୁଣିଛୁ ||8||

 ଆମ ପିଲା ମାନେ ଏ କଥାକୁ ଶୁଣି        

   ଆଶ୍ଚର୍ଯ୍ୟ ହୋଇ ଚାହାଁନ୍ତି

 ସମୟର ଗତି କୁଆଡେ ଯାଉଛି

     ଷାଠିଏ ଗଲାଣି ବିତି ||9||