ଶେଷ କଥା

ବଞ୍ଚିବାର ମିଛ ଅଭିନୟ କରି

ଜୀଇଁବା ଶିଖୁଛି ମୁଁ

ସାଥେ କେହି ନାହିଁ ହାତ ଧରିବାକୁ

ଏକ ଅଲୋଡା ବାଟୋଇ ମୁଁ ।

ହସିବାର ମିଛ ଅଭିନୟ କରି

ମନ ତଳେ ସାଇତିଛି ଅନେକ କୋହ

ନିଜେ ନିଜକୁ ବଳି ପକାଇ ଦିଏ

ପର କରିପାରିନି ମୋ ଲୁହ ।

ରାଗିବାର ମିଛ ଅଭିନୟ କରେ

କେତେ ଅଭିମାନ କରେ ନିଜ ଆଗେ

କେବେ ନିଜେ ନିଜକୁ ବୁଝାଏ ପୁଣି

କେବେ ଅବୁଝା ହୁଏ ନିଜ ପାଖେ ।

ଶୋଇଯିବାର ମିଛ ଅଭିନୟ କରେ

ଉଜାଗର ରହେ ରାତିଦିନ

ସ୍ଵପ୍ନ ଦେଖିବାକୁ ଭାରି ଇଚ୍ଛା ହୁଏ

ଝୁରି ହେଉଥାଏ ଦୁଃଖି ମନ ।

ମିଛ ଅଭିନୟ କରି ସ୍ଵପ୍ନ ସଜାଉ ସଜାଉ

ଭାଙ୍ଗିଯାଏ କେବେ ନିଦ

ଦୋଷ ଦେବି କାହାକୁ,କାହିଁକି ବା ଦେବି

କରୁଛି ନିଜେ ଅପରାଧ ।

ମିଛ ଅଭିନୟରେ ସ୍ମୃତି ସାଉଁଟି ଚାଲିଛି

ମିଳୁଛି ଖାଲି ପ୍ରତାରଣା

ସମୟ ବୋଧେ ବାମ ମୋ ପାଇଁ ହୋଇଛି

କରୁଛି ମୋ ପାଇଁ କରୁଣା ଉଣା ।

ମିଛି ମିଛିକା ଆଉ କାହାରି ଆଗରେ

ପାରୁନି ଆଉ କରି ଅଭିନୟ

ମିଛ ମାୟା ସଂସାରେ ଦଣ୍ଡ ଭୋଗୁଅଛି

ଅପେକ୍ଷା ଶେଷ କିଛି ସମୟ ।