ଶେଷ ଇଚ୍ଛା

କଥା ଦେଇଥିଲି, ସାଥୀ ହେବି ବୋଲି 

   ସାଥୀ ହେବି ବୋଲି ତୁମର, 

ହାଟ ସାରି ବାଟେ ଯାଉ ଯାଉ କାହୁଁ 

   ମାଡି ଆସିଲା ତ ଅନ୍ଧାର l

ସରିଗଲା ମୋର ଜୀବନ ସଉଦା 

    ଅଧା ବାଟେ ଗଲି ରହି, 

ଅଧୁରା ରହିଲା ଜୀବନ ନାଟକ 

   ଅଭୁଲା ପରଶ ହୋଇ l

ସେ ପଟରେ ଡାକେ ଧରମ ର ଦେବ 

     ଏ ପଟେ ରହିଲ ତୁମେ, 

ପାଇଲିନି ଦେଖା ଅନ୍ତିମ କ୍ଷଣରେ 

     ମରମଟି ତା'ରେ ଝୁମେ l

ଯାହା କିଛି ତୁମ ପ୍ରୀତିର ପ୍ରତୀକ 

    ସେତକ ମୋ ଗଣ୍ଠି ଧନ, 

ସେଇ ମୋର ସୁଖ ସରଗ ସମ୍ପଦ 

    ଶଙ୍ଖା ସିନ୍ଦୂରର ଚିହ୍ନ l

ଭାବିବନି କେବେ ଲୁହକୁ ଝରାଇ 

    କରିବନି ମନ ଉଣା, 

ଶିରି ଶିରି ବାଆ ସାଥୀ ହୋଇ ମୁଁ 

    ନିତି ଦେଉ ଥିବି ଚୁମା l

ଭ୍ରମର ସାଥିରେ ଗୀତଟିଏ ହୋଇ 

    ଗାଇବି ମୁଁ ତୁମ ପାଇଁ, 

ତୁମ ଅଗଣାରେ ଫୁଲ ପାଖୁଡ଼ାରେ 

   ହସିବି ମୁଁ ଫୁଲ ହୋଇ l

ଦୁଆରରେ ତୁମ ଦୁବ ଘାସ ହୋଇ 

     ମାଗିବି ଚରଣ ଧୂଳି, 

ଛାଡିଗଲି ବୋଲି ନ କରିବ ରୋଷ 

   ଦେବ ନାହିଁ ମୋତେ ଗାଳି l

ଘିଅ ହଳଦୀରେ ସଜାଇ ଦେବ ଗୋ 

     ଟୋପାଏ ସିନ୍ଦୂର ଦେଇ, 

ନାଲି ଲୁଗା ଦେହେ ପିନ୍ଧାଇବ ମୋର 

     ପାଦରେ ଅଳତା ଦେଇ l

ଅହ୍ୟ ଡେଙ୍ଗୁରା ବଜାଇ ଖଇ କଉଡ଼ିକୁ 

   ଦେବ ମୋ ଶେଯେ ବିଛାଇ, 

ଶେଷ ପରଶର ଛୁଆଁ ଦେଇ ମୋର 

   ଯୁଇକୁ ଦେବ ସଜାଇ l

ଆର ଜନମକୁ ସାଥୀ କରି ମୋତେ 

  ହୃଦୟରେ ଦେବ ସ୍ଥାନ, 

ଯୁଇର ପାଉଁଶେ ଚିଠି ମୁଁ ଲେଖୁଛି

    କରୁଛି ଶେଷ ପ୍ରଣାମ ll