ସ୍ବାଗତ ମାଆ ସିଦ୍ଧିଦାତ୍ରୀ
ସ୍ବାଗତ ମାଆ ସିଦ୍ଧିଦାତ୍ରୀ
ଶାରଦୀୟ ଜ୍ୟୋତ୍ସ୍ନା ଝରା ରାତି
ମେଘମୁକ୍ତ ନଭେ ତାରା ପଂକ୍ତି
ସକାଳର ବିହଙ୍ଗ କୂଜନେ
ମଦମତ୍ତ ଅଳିର ଗୁଞ୍ଜନେ
ଆସ ମାତ ଏ ଅଶିଣ ମାସେ
ଶୁଭ୍ର ସପ୍ତଚ୍ଛଦ କାଶ ବାସେ ।
ଆସ ମାତେ ସିଂହ ବାହନରେ
ନାନା ଜାତି ଫୁଲ ଫଗୁଣରେ
ଭିନ୍ନ ଭିନ୍ନ ରଙ୍ଗର ବିନ୍ଦୁରେ
ସୁହାଗିନୀ ସୀମନ୍ତ ସିନ୍ଦୂରେ
ଆସ ଆଣି ଆନନ୍ଦ ଅପାର
ପ୍ରେମ ହୋଇ ତିକ୍ତ ସମ୍ପର୍କର ।
ଆସ ମାତେ ଶିଶୁର ହସରେ
ଆସ ମାତେ ସମାଜ ସଂସ୍କାରେ
ବ୍ୟାପାରରେ ଲାଭ ହୋଇ ଆସ
ଢ଼ାଳିଦିଅ ଅପାର ଆଶିଷ
ଅନ୍ଧକାରେ ହୋଇ ମା ପ୍ରକାଶ
ଆସ ଆଣି ଅମୃତର ରସ ।
ଭୋକିଲାର ଭୋକ ହେଉ ଦୂର
ସମସ୍ତଙ୍କ ଆଶା ପୂର୍ଣ୍ଣ କର
ଧନଧାନ୍ୟେ ଭର ଏ ଧରଣୀ
ସ୍ବାଗତ ମା ଦେବୀ କାତ୍ୟାୟନୀ
ତମ ଆଗମନେ ନବନିଧି
ପ୍ରାପ୍ତହେଲେ ହେବ ସର୍ବସିଦ୍ଧି ।