ସୌନ୍ଦର୍ଯ୍ୟ ପସରା

ସୌନ୍ଦର୍ଯ୍ୟ ପସରା ବିଶ୍ଵଭୁବନ

ପରିପୂର୍ଣ୍ଣ ଜଳ ସ୍ଥଳ ଗଗନ |

ଦିବସ ରଜନୀ ପ୍ରଦୋଷ ଉଷା

ସର୍ବେ ପରିହିତ ବିଚିତ୍ର ଭୂଷା |

ପ୍ରଭାତ ଅରୁଣ ଚୁମ୍ବୁ ଧରଣୀ

ଶୋଭାର ମୁରୁଜ ବୁଣେ ଖମଣି |

ହିମକଣା ରବି କିରଣେ ଝଳି

ମୁକ୍ତା ସ୍ପଟିକର ଆଭାକୁ ବଳି |

ବିହଙ୍ଗମଗଣ କଳ କୂଜନ

ମୋହିନିଏ ଆମ ପରାଣ ମନ |

ବନେ ଉପବନେ ଫୁଟେ ସୁମନ

ଫୁଲେ ଫୁଲେ ଅଳି କରେ ଗୁଞ୍ଜନ |

ପୂରୁବ ପଶ୍ଚିମ ଦିଗବଳୟ

ଉଦିତ ଅସ୍ତରେ ଲୋହିତମୟ |

ନଭଚୁମ୍ବି ଗିରିମାଳା ଶୋଭନ

ସବୁଜ କେଦାର ଘନ ଅରଣ୍ୟ |

କୁଳୁ କୁଳୁ ବହିଯାଏ ତଟିନୀ

ଶୋହେ ଜନପଦ ତଟବର୍ତ୍ତିନୀ |

ମେଘମାଳା ଶୋଭା ପାଏ ଅମ୍ବରେ

 ବର୍ଷା ବିଜୁଳି ଦମ୍ଭୋଳି ନାଦରେ |

କେବେ ଇନ୍ଦ୍ରଧନୁ ସପ୍ତ ବରନେ

ଶୋଭା ପ୍ରକାଶେ ଆକାଶ ଅଙ୍ଗନେ |

ରାତ୍ରେ ତାରକା ମେଳେ ସୁଧାକର

ଜ୍ୟୋତ୍ସ୍ନା ଢାଳନ୍ତି ଅବନୀ ଉପର |

ନୀଳ ସାଗରେ ଉଠଇ ଲହରୀ

ସୌର କରେ ଝଲକେ ପ୍ରତିଫଳି |

ଏତେ ବାହାର ପ୍ରକୃତି ସୁନ୍ଦର

ସର୍ବୋତ୍ତମ ସୁନ୍ଦରହିଁ ଈଶ୍ୱର |

ସ୍ନେହ ପ୍ରେମ ହସ ଭାରି ସୁନ୍ଦର

ରୂପ ଠାରୁ ଗୁଣ କର ଆଦର |