ସାମାନ୍ୟ କଥନ

ନିଜ ଭିତରେ ମୁଁ ନିଜକୁ ଖୋଜିଛି

ଶୁଣିନାହିଁ କାହା କଥା

ହଜିଛି ଖୋଜିଛି କେବଳ ପାଇଛି

ଛାତିରେ ଛାତିଏ ବ୍ୟଥା I

ନିଜ କର୍ମଫଳ ନିଜେ ମୁଁ ଭୋଗିଛି

କେ ଦେଇନି କିଛି ଯାଚି

ଡାଳରେ ଝୁଲୁଛି ମିଠା ଫଳଟିଏ

ଗଛରେ ଯାଇଛି ପାଚି I

ଦେହ ଭୂଗୋଳରେ ଲେଖି ଦେଇଛି ମୁଁ

ପୃଷ୍ଠ ପୃଷ୍ଠା ଇତିହାସ

ଖାଲ ଖମା ଭରା ଜୀବନର ପଥ

କିଛି ଲୁହ କିଛି ହସ I

କୀବନ ଭିତରେ କେତେ ମୁଁ ଖୋଜିଛି

ମରଣ ଦେଇନି ଦେଖା

ପାପୁଲିରେ ମୋର ଦେଖୁଛି ନିତି ମୁଁ

ପାପୁଲିଏ ଭାଗ୍ୟରେଖା I