ସାହିତ୍ୟ ଓ ସମାଜ
ସାହିତ୍ୟ ଓ ସମାଜ
ସୃଷ୍ଟିର ଅନାଦି କାଳରୁ ମନୁଷ୍ୟ
ସମାଜରେ ରହି ଅଛି
ସମାଜର ଅଗ୍ରଗତି ସୃଷ୍ଟି ସ୍ଥିତି
ଲୟ ମଧ୍ୟରେ ବଞ୍ଚିଛି ll 1
ସମାଜ ନଥିଲେ ଭାଷା କେବେହେଲେ
ଜନମ ହୋଇ ନଥାନ୍ତା
ଭାଷା ବ୍ୟବହାର ନଥିଲେ ମାନବ
ସଭ୍ୟତା କିପରି ଥାନ୍ତା..? Il 2
ପ୍ରାଚୀନ ଜୀବନ ଆଧ୍ୟାତ୍ମ ବିକାଶ
ସାହିତ୍ୟରେ ପରିପୁଷ୍ଟ
ଜାତି ଓ ଦେଶର କଲ୍ୟାଣ ବିଧାନ
ସାହିତ୍ୟ ନେଇ ସଂଶ୍ଲିଷ୍ଟ ll 3
ସମାଜେ ମାନବ ପାଇଁ ସମ୍ୟକରେ
ହିତ ସାଧଇ ନିଶ୍ଚିତ
ସମାଜ ସାହିତ୍ୟ ଅଙ୍ଗାଙ୍ଗୀ ଜଡ଼ିତ
ପଥ କଢାଏ ସାହିତ୍ୟ ll 4
ଆଜି ସମାଜର ପୂର୍ଣ୍ଣ ବିକାଶକୁ
ଭାଷା ସାହିତ୍ୟ ବହଇ
ତେଣୁ ଭାଷା ଅଟେ ସମାଜ ଦର୍ପଣ
ବିକାଶ ଓ ଭିତ୍ତି ତହିଁ ll 5
ମନୁଷ୍ୟ ମନର ସୁଖ ଦୁଃଖ ଭାବ
ଆନନ୍ଦ ବିଷାଦ ହାସ୍ୟ
ଲୁହ ଓ ବିଭତ୍ସ ଭଲମନ୍ଦ ସହ
ହାନି ଲାଭ ଦିଏ ଦୃଶ୍ୟ ll 6
ମନୁଷ୍ୟ ନିଜର ପାରିପାଟୀ ବାଛେ
ଦର୍ପଣ ଆଗରେ ରହି
ସାହିତ୍ୟ ସମାଜ ବେଶ ପୋଷାକକୁ
ଗଳ୍ପ କବିତାରେ କହି ll 7
ସମାଜ ସାହିତ୍ୟ ଦର୍ପଣେ ଦେଖଇ
ନିଜ ଦୋଷ ଗୁଣ ଯେତେ
ଯତ୍ନବାନ ହୁଏ ଦିନୁ ଦିନ ସିଏ
ପଥ ପ୍ରଦର୍ଶକ ସତେ ll 8
ସାହିତ୍ୟ ଦିଅଇ ଉପଯୁକ୍ତ ମୂଲ୍ୟ
ବାନ ବାଣୀ କେତେ ଆଣି
ଭାବ ଧାରା ଆଉ ପଠନ ଶଇଳୀ
ମହତ ପୁରୁଷ ବାଣୀ ll 9
ଉପଯୁକ୍ତ ମର୍ଯ୍ୟାଦା ଦାନେ ସାହିତ୍ୟେ
ପଥଚ୍ୟୁତ ଭୟ ନାହିଁ
ଆଦର୍ଶ ନେତୃତ୍ୱ ପଥରେ ସାହିତ୍ୟ
ସଭିଙ୍କୁ ସାଥି କରଇ ll 10