ସ୍ୱପ୍ନ ସମାଚାର

ଖୋଲି ଦିଅ ଅବରୁଦ୍ଧ ଚେତନାର ଦ୍ୱାର

ବୁଢ଼ାରଜାର ଗର୍ଭ ଗହ୍ୱର

- ସଚରାଚର ବିଶ୍ଵର ବ୍ୟାପକ ବଜାର ।

ଆସିବାକୁ ଦିଅ: ଅଫୁରନ୍ତ ପ୍ରାଣପ୍ରାଚୁର୍ଯ୍ୟର

ମଧୁ ମଲ୍ଲିକା

ଗାନ୍ଧି ଗୋପବନ୍ଧୁଙ୍କ ସ୍ୱପ୍ନର ସହର

ପ୍ରଗତି ଓ ପରିବର୍ତ୍ତନର ସପ୍ତ ମହାନ ସଂସ୍କାର ।

ଚହଟିବାକୁ ଦିଅ:

ଅଭିଯାତ୍ରୀର ଅପ୍ରତିହତ ଚିନ୍ତାଧାରାର

କୌମୁଦୀ ସୌରଭ

କୃଷି ଶ୍ରମିକର ଅନବରତ ସାଧନାର ସୁରଭିତ ମଳୟ

ସର୍ବହରା ଜନତାର ଆତ୍ମସନ୍ତୋଷଭରା

ଦରୋଟି ହସ ।

ଏବେ ବାଜିବାକୁ ଦିଅ

ଐକ୍ୟବଦ୍ଧ ଉଦ୍ୟମ ଓ ମିଳିତ ସଂଗ୍ରାମର ରଣଦୁନ୍ଦୁଭି:

କ୍ଷୁଧା, ଦାରିଦ୍ର୍ୟ, ବେକାରୀ, ଦୁର୍ନୀତିର ମୂଳୋତ୍ପାଟନ ପାଇଁ

ସାମାଜିକ ଶ୍ରେଣୀ ବୈଷମ୍ୟ ଓ

ଘୁଣଧରା ଜାତିବାଦର ଦୂରୀକରଣ ପାଇଁ

ପ୍ରଦୂଷିତ ରାଜନୀତି ଓ ପର୍ଯ୍ୟାୟ ପତିତ ପ୍ରଶାସନର

ପରିବର୍ତ୍ତନ, ସମ୍ବେଦନଶୀଳ ମାନସିକତା ପାଇଁ

ମୌଳବାଦୀ ଉଦ୍‌ଗୀରଣ ଓ

ବିଚ୍ଛିନ୍ନତାବାଦୀ କାର୍ଯ୍ୟକଳାପର ନିରାକରଣ ପାଇଁ

ସାଂସ୍କୃତିକ, ରାଜନୈତିକ, ଆର୍ଥିକ, ସାମାଜିକ ଓ ଧାର୍ମିକ

ଶୋଷଣର ସୁଦୃଢ଼ ମୁକାବିଲା ପାଇଁ

ଚେତନାଶୀଳ, ଯୁଗୋପଯୋଗୀ ଆଭିମୁଖ୍ୟର

କ୍ରିୟାନ୍ୱୟନ ପାଇଁ

ସୃଜନଶୀଳତାର ଭିନ୍ନ ଏକ ଦିଗନ୍ତର

ସମ୍ପର୍କର ସୁରମ୍ୟ, ପୃଥକ୍ ଏକ ପରିଭାଷା ପାଇଁ ।