ସ୍ୱଚ୍ଛ ଭାରତ

ଗଛ୍,ପତର୍ କାଟି ଫେକଟିରି କରୁଛ

ହେମି କହିକରି ରଜା 

ଠିକ୍ ସମିଆ ଥି ବର୍ଷା ନାଇଁ ହେବାର୍

ପାଏଛୁ କେତେ ସଜା ।

ଆକାଶେ ଉଡୁଛେ କଲା ଧୂଆଁ କେତେ

କଲ କାରଖାନା ର,

ପରିବେଶ କେ ଖରାପ୍ କରୁଛେ

ସେ ତ ଅହ ରହ୍ ।

ଗାଡି,ମଟର୍ ଚାଲୁଛେ ଦିନ୍ କେ ରାଏତ୍

ରୋଡ୍ ଘାଟ୍ ଦିସୁଛେ କଲା ,

ନିଶ୍ବାସ ନେବାର୍ ଟା ବଡା କଡା ଲାଗୁଛେ

ଜୀବନ ହେଲା ବଡା ଗୁଲଗୁଲା ।

ଲାଏଜ୍ ସରମ୍ ମୁନୁଷ୍ ପୁଡେଇ ଖାଏଲେ

ଯାହି ଦେଖବ୍ ଜରି ମାଙ୍ଗ୍'ଲେ,

ପରିବେଷ୍ କେ ଖରାପ୍ କରବାର୍ ଲାଗି

ଆରୁ ପାଦେ ଆଗ୍ କେ ଗଲେ ।

ନଏଦ୍,ନାଲ୍ ସବୁ ବିଷ୍ ହେଇ ଗଲାନ

ଜରି,ଫେକଟିରି ପାଏନ୍ ପଡି

ପରିବେଶ ଧିରେ ଧିରେ ବଦୁଲୁଛେ

ବିନାସ ରୁପ୍ କେ ଧରି  । ।

ସମିଆ ଅଛେ ଆସ ମିଲିମିଶି ଜିମା ବଦିଲି

ପରିବେଶ କେ ସଫା କର୍'ମା

ଗଛ୍ ଗୁଟେ ଗୁଟେ ଲଗେଇ ସବେ

ଜରି କେ ବର୍ଜନ କର୍'ମା ।