ରୂପବତୀ ଚିଲିକା

ରୂପବତୀ ଚିଲିକା

କିଏ ଗଢିଦେଲା ତୋତେ

କେଉଁ ବିନ୍ଧାଣିର

କଳ୍ପନାରେ ତୋର

ଜନମ ହୋଇଛି

କେତେ ଉପମାରେ

ସୃଷ୍ଟିକଲା ତୋତେ

ସୁନ୍ଦରୀ ସୁକୁମାରୀ

ହରଦଟିଏ।

ଚିକମିକ ଦିଶୁଥାଏ

ତୋ ମୁଖମଣ୍ଡଳ

ଶ୍ବେତ ନୀଳାଭ ବସ୍ତ୍ରେ

ପରିହିତା ଅବଗୁଣ୍ଠନବତୀ

ଲଜ୍ଯାଶିଳା ପରିମାର୍ଜିତା

ମରାଳ ମାଳିନୀ

ତୁହିଲୋ ଚିଲିକା।

ବଧୂବେଶ ତୋର

ଦିଶଇ ସୁନ୍ଦର

ବିହଙ୍ଗମର ଆସରେ

ସଜେଇ ହେଇଛୁ,

ଶ୍ଯାମଳ ତରୁରେ

ଗଭାକୁ ମଣ୍ଡେଇ

ବଧୂ ବେଶ ହୋଇ

ଅପରୁପ ଦିଶେ

ତୋ ତନୁବଲ୍ଲରୀ।

କାଳିଜାଇ ପାହାଡ ତୋ

ଅଟେ ମଥାମଣୀ

କର୍ଣ୍ଣରେ କର୍ଣ୍ଣ କୁଣ୍ଡଳ

ପାରିକୁଦ ମାଲୁଦ

କଣ୍ଠେ ଲମ୍ବିଅଛି

ତରିଣୀର ହାର,

ଯେଉଁଠି ହୋଇଛି ଖଞ୍ଜା

ମଣିମୁକୁତା ସମାନ

ଜାତିଜାତି ଜଳଚର।

ହାତେ ତୋର ଶୋଭାପାଏ

ଗିରିରୂପି କଙ୍କଣ

ଅଣ୍ଟାରେ ଅଣ୍ଟାସୂତା

ସାଜିଛି ବରୁଣ।

ଲୋହିତ ଭାସ୍କର

କପାଳେ ତୋହର

ନାଲି ସିନ୍ଦୁର ସମ

ଜଳୁଅଛି ଦାଉଦାଉ।

ଚଢେଇଗୁହାର ଆସରେ

ବନନ୍ତି ଦର୍ଶକେ

ଅବଲୋକନ କରନ୍ତି

ତୋ ରୂପମାଧୂରୀ।

ଧନ୍ଯ ସେ ବିନ୍ଧାଣି

ଗଢିଲା ତୋ ଠାଣି

ଯୁଗେଯୁଗେ ଅକ୍ଷୟ

ତୋ କୀରତି

ଉତ୍କଳ ପ୍ରଦେଶେ

ଅଟୁ ପରା ମଣି ।