ରଥଯାତ୍ରା
ରଥଯାତ୍ରା
ଶ୍ରୀମନ୍ଦିରେ ବସି କାଲିଆ ସାଆନ୍ତ
ବୁଝୁଥିଲେ ଦୁ୍ଃଖ ସୁଖ
ନବଦିନ ପାଇଁ ମାଉସୀ ଘରକୁ
ଯିବେ ହେ ଭକତେ ଦେଖ ।
ଭକ୍ତ ମେଳରେ ଟାହିଆ ହଲାଇ
ଝୁଲି ଝୁଲି ଜଗନ୍ନାଥ
ବଳିଆ ଭାଇ ଓ ସୁଭଦ୍ରା ଭଉଣୀ
ଟାହିଆ ପିନ୍ଧିବେ ମାଥ। ।
ବରଷକେ ଥରେ ଗୁଣ୍ଡିଚା ଯାତ୍ରା ରେ
ଭାଇ ଭଉଣୀଙ୍କୁ ଧରି
ଗୁଣ୍ଡିଚା ନବର ବୁଲି ଯିବେ ପ୍ରଭୁ
ରଥ ଯାନେ ବସି କରି ।
ତାଳଧ୍ଵଜ ରଥେ ଭାଇ ବଳରାମ
ଭଉଣୀ ଦର୍ପଦଳନେ
ନନ୍ଦିଘୋଷେ ବିଜେ କାଲିଆ ସାଆନ୍ତ
ଭକତ ଭିଡଗହଣେ ।
ବଡ଼ଦାଣ୍ଡ ଆଜି ଗହଳ ଚହଳ
ସମାଗମ ଭକତର
ଗୋଟିପୁଅ ନାଚ ମୃଦଙ୍ଗ କୀର୍ତ୍ତନ
ହୁରି ପଡେ ଭକତର ।
ବଡ଼ଦାଣ୍ଡ ଠାରୁ ଗୁଣ୍ଡିଚା ମନ୍ଦିର
ଭକ୍ତଙ୍କ ହୁଏ ଛାଉଣୀ
ଲକ୍ଷ ଲକ୍ଷ ଭକ୍ତ ଦର୍ଶନ କରିଣ
ରଥ ଭିଡ଼ି ସୁଖ ମଣି ।
ବିଶ୍ଵ ପ୍ରସିଦ୍ଧ ରଥଯାତ୍ରା ତୁମ
ଜଗତ ପାରିଛି ଜାଣି
ଆହେ ଦାରୁବ୍ରହ୍ମ ଚତୁର୍ଦ୍ଧାମୂରତି
ଜଗତର ଶିରୋମଣି ।
ମାଉସୀ ଘରକୁ ପୋଡପିଠା ଖାଇ
ଯାଉଛ ଜଗତ ସାଇଁ
ସବୁ ତ ତୁମରି ସର୍ଜନା ହେ ପ୍ରଭୁ
ମୋର ବୋଲି କିଛି ନାହିଁ ।
ଆଷାଢ଼ ମାସର ଶୁକ୍ଳପକ୍ଷ ଦ୍ଵିତୀୟା
ଗୁଣ୍ଡିଚା ଯାତ୍ରା ତୁମ
ନବ ଦିନ ଯାତ୍ରା ସାରି ମହାବାହୁ
କରିବ ପ୍ରତ୍ୟାବର୍ତ୍ତନ ।
ଆଷାଢ଼ ମାସର ଶୁକ୍ଳପକ୍ଷର
ଦଶମୀ ତିଥିରେ ପୁଣ
ଶ୍ରୀମନ୍ଦିରେ ବିଜେ କରି ଚଉବାହା
ଭକତ ର ଡାକ ଶୁଣ ।