ରକ୍ଷା କର ମହାମାୟୀ

ଶରତ ଆକାଶେ ଶଶଧର ହସେ ଝଲସେ ବିମଳ ଜ୍ୟୋତ୍ସ୍ନା

ପୁଲକିତ ପୃଥ୍ୱୀ ପାଇ ସେ ପରଶ ଫୁଲ ଫୁଟି ଛୁଟେ ବାସ୍ନା

ଶୁଭ୍ର ଅମ୍ଵୁଦେ ୟେ ଅମ୍ବରେ ଅଧୀରେ ଉଡ଼ନ୍ତି ଅନିଳ ସାଥେ

ଅଖିଳ ବିଶ୍ୱକୁ ରୋମାଞ୍ଚିତ କରି ଶରତ ରାତି ପ୍ରକାଶେ ।।

ଶରତ ଲଗନ ଉତ୍ସବ ପାର୍ବଣ ସୁମନ ଜୁଣ ତୃଣର

ଢାଳଇ ଧବଳ ଚାମର ଧରଣୀ ବହେ ଶୀତଳ ସମିର

ନିରିମଳ ଜଳ ଝର ଝରଣାର ଚଳଚଞ୍ଚଳ ତା ଗତି

ଏଶୁଭ ବାସରେ ଆବାହନ କରେ ଆସ ଦେବୀ ହୈମବତୀ ।।

ଅନେକ ମହିଷାସୁର ଆଜି ଏଠି ଅନ୍ଧାରେ ଆବୃତ ମହୀ

ଅନେକ ଭୂତାଣୁ ଭୂତ ଭୟଙ୍କର ମଣିଷର “ରକ୍ତ ପିଇ

ବଳିୟାନ” ଏଠି ଦେଖ ଆସି ଏହି ପାର୍ବଣ ତିଥିରେ ଦେବୀ

ସତେକି ସୁଦୟା କରିବୁ ଶର୍ବାଣୀ ବଦଳାଇ ଦେବୁ ଛବି ।।

(ତୋ) ଆଶିଷ ଅମୃତ ଅପେକ୍ଷାରେ ଆଜି ଚାତକ ପରାୟ ହୋଇ

ବସିଅଛୁ ଚାହିଁ ଅବତୀର୍ଣ୍ଣ ହୋଇ ରକ୍ଷା କର ମହାମାୟୀ ।।