ରଜମଉଜ
ରଜମଉଜ
ଅନନ୍ୟ ସେ ଅନୁଭବ ରଜ ମହୋତ୍ସବ,
ଆକାଶ ଓ ପୃଥିବୀର ମିଳନର ପର୍ବ ।
ଚୌହଦୀରେ ଢେଉ ଖେଳେ ଖୁସିର ଜୁଆର,
ଅପୂର୍ବ ପୁଲକ ସତେ ସେ ରଜଦୋଳିର ।
ପୋଡପିଠାର ମହକ ଆହାକି ମଧୁର,
ରଜପାନ କିଣିନିଏ ମନ ସଭିଙ୍କର ।
ରଜଦୋଳି ରଜଗୀତ କୁଆଁରୀଙ୍କ ମେଳ,
ପୁଅଙ୍କର ଲୁଡୁ, ତାସ, ବାଗୁଡିର ଖେଳ ।
ପହିଲି ରଜର ସେ କି ସ୍ନିଗ୍ଧ ସମ୍ମୋହନ,
ରଜ ସଂକ୍ରାନ୍ତିର କେତେ ମୁଗ୍ଧ ଆକର୍ଷଣ ।
ଭୂମି ଦହନ ସାଙ୍ଗକୁ ବସୁମତୀ ସ୍ନାନ,
ଭିଜାମାଟିର ବାସ୍ନାରେ ବିଭୋର ଏ ମନ ।
ଚଷା ପୁଅର ଆଖିରେ ଅସୁମାରି ସ୍ୱପ୍ନ,
ଏଇଠୁ ଆରମ୍ଭ ତା'ର କୃଷି ଅଭିଯାନ ।
ରଜ ଆସେ ସାଥେ ନେଇ ଶାନ୍ତି ମୈତ୍ରୀ, ପ୍ରୀତି,
ଯୁଗ ଯୁଗ ଜୀଇଁଥାଉ ଏ ମହା ସଂସ୍କୃତି ।