ରଜ ପର୍ବ

କୃଷିର ପରବ

ଓଡ଼ିଶାରେ ଶ୍ରେଷ୍ଠ

     ମାଟି ମାଆ ଗାଥା ଗାଏ

ରଜ ସଜବାଜ 

ମଉଜ ସଉକ

     ଘରେ ଘରେ ହୋଇଥାଏ ।

ନିଦାଘର ଅନ୍ତେ

ରଜସ୍ଵଳା ହୁଏ

    କୁଆଁରୀ ହୋଇଛି ମାଟି

ବରଷା ରାଣୀର

ଆଗମନ ଦେଖି

    ଚଷାଭାଇ ହୁଏ ଖୁସି ।

ଓଡ଼ିଶା ମାଟିରେ

ରଜ ଚାରି ଦିନ

    ପୁର ପଲ୍ଲୀରେ ଚମକ

ପହିଲି ରଜଟି

ସଜବାଜ ରଜ

    ପୋଡପିଠାର ମହକ ।

ଝିଅ ବୋହୂମାନେ

ସଜେଇ ହୁଅନ୍ତି

    ନୂଆ ବସ୍ତ୍ର ପରିଧାନ

ନୂଆ ଶଙ୍ଖା ଚୁଡି

ପାଉଁଜି କଙ୍କଣ

    ପିନ୍ଧନ୍ତି କେତେ ସୁବର୍ଣ୍ଣ ।

ଟିପି ଚନ୍ଦନରେ

ମଥାକୁ ସଜାନ୍ତି 

    ପାଦରେ ଅଳତା ଗାର

ମୁଣ୍ଡରେ ଖୋସନ୍ତି

ସଜଫୁଲଟିଏ

    ଦେହରେ ମାଖି ଅତର ।

ରଜ ଦୋଳି ଗୀତ

ଭାସି ଆସୁଥାଏ

    ପବନ ସୁଅ ତରଙ୍ଗେ

କୁଆଁରୀ ବୟସେ

ଝିଅ ଦୋଳି ଖେଳେ

    ଗାଉଥାନ୍ତି ମିଶି ସଙ୍ଗେ ।

ଦ୍ୱିତୀୟ ଦିନଟି

ରଜ ସଂକ୍ରାନ୍ତି

   ତୃତୀୟେ ଭୂମି ଦହନ

ଚତୁର୍ଥ ଦିନଟି

ବସୁମତୀ ସ୍ନାନ

    ହୁଏ ବନ୍ଦାପନା ମାନ ।

ରଜ ଖିଲି ପାନେ

ଭାବ ଦିଆନିଆ

    ସମ୍ପର୍କର ନୂଆ ଡୋରି

ଫୁଲେଇ ହୋଇଣ

ଘରେ ଘରେ ବୁଲେ

   ପାଦ ରୁଣୁଝୁଣୁ କରି ।

ନିଷିଦ୍ଧ ରହିଛି

କୃଷି କାର୍ଯ୍ୟ ସହ

    ଘରରେ ମସଲା ବଟା

ଢିଙ୍କି ହେମଦସ୍ତା

ଘୋରଣା ଶିଳରେ

    ହୁଏ ନାହିଁ ଛେଚା କୁଟା ।

ପୁଚି କଉଡିରେ

ଗାଆଁ ଫାଟି ଉଠେ

    ଖେଳନ୍ତି ସର୍ବେ ହରଷେ

ଭାତ ମାଂସ ଭୋଜି

ଆମ୍ବ ପଣସରେ

    ଘର ଦ୍ୱାର ସବୁ ବାସେ ।

ବ୍ରହ୍ମଗିରି ଠାରେ

ବାଲି ହରଚଣ୍ଡୀ 

    ଶକ୍ତି ପୀଠ ଯେ ପ୍ରସିଦ୍ଧ

ରଜର ସମସ୍ତ 

ବିଧିବିଧାନ ତ

    ମାଆଙ୍କର ରଜଯାତ ।

    

ସଂସ୍କୃତିର ପର୍ବ

ମହାମିଳନର

     ପ୍ରକୃତିର ବାର୍ତ୍ତାବହ

ବର୍ଷା ଆଗମନେ

ସ୍ୱାଗତ ଉତ୍ସବ

     ନୂଆ ସମ୍ଭାବନା ସହ ।