ରାମ ନବମୀ

ତ୍ରେତୟା ଯୁଗରେ ଅଯୋଧ୍ୟା ନଗରେ

ରାଜା ଥିଲେ ଦଶରଥ,

ଥିଲେ ନୃପତିଙ୍କ ତିନି ଗୋଟି ରାଣୀ

କୋଳରେ ନଥିଲା ପୁତ୍ର ।

ଗୁରୁ ଉପଦେଶେ  ଋଷ୍ଯଶୃଙ୍ଗ ପାଶେ 

ରାଜା ହେଲେ ଉପନୀତ

ଋଷିଙ୍କ ଚରଣ  ବନ୍ଦନା କରିଣ

ବଖାଣିଲେ ସବୁ ତଥ୍ୟ ।

ବୋଇଲେ ଭୋ ମୁନି  ପୁତ୍ରେଷ୍ଠି ଯଜ୍ଞର

ପ୍ରୟୋଜନ ପୁତ୍ର ପାଇଁ,

କରିବା ସେ ଯଜ୍ଞ  ଘେନ ନିମନ୍ତ୍ରଣ

ମୁଖ୍ୟ ରହିବେ ଗୋସାଇଁ ।

ଯଜ୍ଞ ଚରୂ ପାଇ ରାଣୀ ମାନଙ୍କର

ହୋଇଲା ଉଦୟ ଗର୍ଭ ,

ନାଚିଲେ ଗାଇଲେ ଶଂଖନାଦ କଲେ

ଅଯୋଧ୍ଯାର ପ୍ରଜା ସର୍ବ ।

ଚୈତ୍ର ଶୁକ୍ଳ ପକ୍ଷ ହେଲା ଉପସ୍ଥିତ

ପ୍ରସସ୍ଥ ତିଥୀ ନବମୀ,

ଏ ପବିତ୍ର ଦିନେ  ଭୂମିଷ୍ଠ ହୋଇଲେ

ପ୍ରଭୁ ରାମ ସୀତା ସ୍ଵାମୀ ।

ପିତୃ ସତ୍ୟ ପାଳି  ବଣେ ଗଲେ ଚଳି

କରିଲେ ଅସୁର ନାଶ,

ତପସ୍ୱୀ ମାନଙ୍କୁ  ରକ୍ଷା କରିଥିଲେ

ଧରାରେ ଧର୍ମ ପ୍ରକାଶ ।

ଗ୍ରାମଠୁଁ ସହର  ଉତ୍ସବ ମୁଖର

ରାମ ନବମୀର ପାଇଁ,

ସ୍ଥାନେ ସ୍ଥାନେ ସବୁ  ତୋରଣ ସାଜିଛି

ପୂଜା ପାଉଛନ୍ତି ବିହି ।

ଭକ୍ତ ଭଗବାନ  ଦୁହିଁଙ୍କ ମିଳନ

ମୋକ୍ଷ ପ୍ରାପ୍ତି ଭାବ ଧାରା,

ପ୍ରଭୁ ରାମଙ୍କର  ଜନ୍ମଦିନ ଆଜି

ଉଛୁଳୁଛି ବସୁନ୍ଧରା ।