ପୂର୍ଣ୍ଣିମା ତିଥି
ପୂର୍ଣ୍ଣିମା ତିଥି
ଜହ୍ନ ରାତି ମଧୁକ୍ଷରା
ରାତି ଆଜି ପ୍ରୀତି ଝରା
ଜହ୍ନ ଜହ୍ନ ମୁହଁ ସବୁ ସୁଗନ୍ଧେ ବିଭୋର
ରାତି ଆଜି ସମାହିତ ମୁଗ୍ଧ ଚୈତନ୍ୟର ।
କାଦମ୍ବରୀ ନିଶା ଘାରେ କା ' ମଧୁ ପରଶେ
ସନ୍ତର୍ପଣେ ଶେଫାଳୀ ବି ମୃଦୁ ମୃଦୁ ହସେ ।
ଟିକେ ଶୁଣ "ନୀଳମଣି "
ରାତି ଆଜି ପ୍ରେମାବିଷ୍ଟ ଇପ୍ସିତ ବାନ୍ଧବକୁ ପାଇ
ଜହ୍ନରେ ତନ୍ମୟପଣ ତୁମରି ପାଇଁ
ନିଶିଥିନୀ ସଜେଇଛି ନିଶିଗନ୍ଧା ଭେଟି ଦେବା ପାଇଁ ।
କାହିଁକି ଜାଣ "ନୀଳମଣି "
ଆଜି ଗୋ କାର୍ତ୍ତିକ ପୂର୍ଣ୍ଣମୀ ପୂଣ୍ୟ ତିଥି
ତୁମ ଅନୁରାଗୀ ପୂଜାର୍ଚ୍ଚନା ,ପ୍ରୀତି ଅର୍ଘ୍ୟ ରାତି ।
ଦେଖ କଳା କାହ୍ନୁ
ଜହ୍ନ ଆଜି ଶିହରିତ ତୁମ ପ୍ରେମ ଅନୁରକ୍ତିରେ
ଆଉ ଜହ୍ନ ସହ ପ୍ରୀତି ତୁମ ନିରୋଳା ପହରେ
କେମିତି ଏତେ ବାସ ବିସ୍ତାରେ
କେମିତି ଏତେ କାୟା ପ୍ରସାରେ
ହେ "ନୀଳମଣି "
ତୁମ ସୁଗନ୍ଧରେ ଜହ୍ନ ବାସେ କସ୍ତୁରୀ କସ୍ତୁରୀ
ସତେକି , ରାହାସ ବେଦୀରେ ଯୁଗଳ ରସାମୃତ ଲହରୀ ।