ପ୍ରତିଶୋଧ

ବିଚିତ୍ର ସଂସାରେ ମାନବ ଜାତିଟା

ଅଟଇ ମହାବିଚିତ୍ର ।

କେତେବେଳେ କେଉଁ ଅଭିନୟ କରେ

ସେ ଗୋଟିଏ ଯେ ଜୋକର ।

କଥାରେ ଅଛି ଯେ ନରମାୟା ସଦା

ବିଷ୍ଣୁଙ୍କୁ ଯେ ଅଗୋଚର ।

ଷଡରିପୁ ଦ୍ବାରା ହୋଇ ବଶବର୍ତ୍ତୀ

ବଦଳାଏ ରୂପ ତା'ର ।

କେବେ ସୁଖରେ ହୁଏ ସେ ଆତ୍ମହରା

ଦୁଃଖେ ହୁଏ ଅତିଦୁଃଖୀ ।

କେବେ ଅଭିମାନେ ହୁଏ ଅଭିମାନୀ

କ୍ରୋଧେ ତା'ର ନାଲି ଆଖି ।

ବ୍ଯକ୍ତି-ବ୍ଯକ୍ତି ମଧ୍ୟେ ହୁଅଇ ଶତ୍ରୁତା

ଶତ୍ରୁତାରୁ କ୍ରୋଧୋତ୍ପନ୍ନ ।

କ୍ରୋଧେ ହୋଇ ପ୍ରତିଶୋଧ ପରାୟଣ

ଅନର୍ଥ କରଇ ପୁଣ ।

ପ୍ରତିଶୋଧ ନିଆଁ ଅତି ଭୟଙ୍କର

ଭୁଲେ ସେ ମାନବିକତା ।

ଅନ୍ଯର ସେ ଯାହା କରିଥାଏ କ୍ଷତି

ଆତ୍ମ କ୍ଷତି କରେ ଅଯଥା ।

ପ୍ରତିଶୋଧ ନୁହେଁ ମଣିଷପଣିଆ

ସବୁଠି ଲଭେ ଅଯଶ ।

ମାନବରୁ ହୁଏ ମହାଦାନବ ସେ

କରିଥାଏ ସର୍ବନାଶ ।

ଦୁର୍ଯ୍ୟୋଧନ ଥିଲା ମହା ପ୍ରତିଶୋଧୀ

ଚିନ୍ତିଲା ପାଣ୍ଡବ ଧ୍ବଂସ।

ଯୁଦ୍ଧକରି ଶେଷେ ହୋଇଲା ହତାଶ

ହୋଇଗଲା ସର୍ବନାଶ ।

ଭାରତ ବିରୋଧୀ ଅଟେ ପାକିସ୍ତାନ

ହୋଇ ଚିନ୍ ର ଦ୍ବାରସ୍ଥ ।

ଭାରତର ପ୍ରତିଶୋଧ ନେବାକୁ ଯେ

ହେଉଛନ୍ତି ଛଟପଟ ।

ଦେଶ-ଦେଶ ମଧ୍ଯେ ଶତ୍ରୁତା କାରଣୁ

ନେବାକୁ ଯେ ପ୍ରତିଶୋଧ ।

ଅଶାନ୍ତ ଭାବରେ ଦିଅନ୍ତି ଆହ୍ବାନ

କରିବାକୁ ଦ୍ବନ୍ଦ୍ବଯୁଦ୍ଧ ।

ଜ୍ଞାନହୀନ ପଶୁପକ୍ଷୀମାନଙ୍କର

ନାହିଁ କୁତ୍ସିତ ଭାବନା ।

ପରସ୍ପର ମଧ୍ଯେ ସୁଖରେ ବଞ୍ଚନ୍ତି

ହୋଇ ସର୍ବେ ଏକମନା ।

କ୍ରୋଧ ସୃଷ୍ଟି କରେ ହିଂସାର ଭାବନା

ହିଂସାରୁ ଯେ ପ୍ରତଶୋଧ ।

ଧର୍ମ-ଅଧର୍ମକୁ ଭୁଲିଯାଇ ନର

ନିରୀହଙ୍କୁ କରେ ବଧ ।

ଜେହାଦୀ ନାମରେ ଆତଙ୍କବାଦୀଏ

ହୋଇ ହିଂସାରେ ଉନ୍ମତ ।

ରାଷ୍ଟ୍ର ଓ ବ୍ଯକ୍ତିର କରନ୍ତି ବିନାଶ

ପ୍ରତିଶୋଧେ ଜର୍ଜରିତ ।

ପ୍ରତିଶୋଧ ନୁହେଁ ସମାଧାନ ପନ୍ଥା

କରିଲେ କାହା ଅନିଷ୍ଟ ।

ହିଂସା ପରିହରି ଅହିଂସାଚରିଲେ

ଶାନ୍ତି ହେବ ପ୍ରତିଷ୍ଠିତ ।