ପ୍ରତିକ୍ଷଣ ଫାଇଲରେ

କେତେ କେତେ ଭୋକିଲା ପେଟ ଏଠି ଘୁରିବୁଲୁଥାଏ

ସାରା ଦିନ ସାରା ରାତି

ଏଇଠି ଯେଉଁଠି ନିୟମ ଭଙ୍ଗା ଯାଏ ଗଢ଼ା ଯାଏ

ଫାଇଲ ଫର୍ଦରେ ଅଫିସ ହତାରେ

ଅନେକ ଆଖିରୁ ପାଣି ସରି ଆସିଲାଣି

କେତେ କେତେ ଆଖି ଭୁଲିଗଲାଣି ସ୍ବପ୍ନ ଦେଖିବାଟା

ଏଇଠି ଯେଉଁଠି କିଏ କେତେ ପାଏ ନିଅ

ଆଙ୍ଗୁଠି ଖେଂଜି ସୁରୁଜ ଆଖିରେ

ଫାଇଲ ଫର୍ଦରେ ଅଫିସ ହତାରେ

ଚାଲି ଚାଲି ଅନେକ ପାଦ ଥକି ଗଲାଣି

ପୂର୍ଣ୍ଣ ପତ୍ର ସବୁଜ ଗଛଟା ନଇଁ ଗଲାଣି

ଥୁଣ୍ଟା ବୟସ ଆଡକୁ

ଏଇଠି ଯେଉଁଠି ନିୟମ ଭାଙ୍ଗି ଗଢ଼ାହୁଏ

ନୂଆ ଫାଇଲ ଫର୍ଦରେ ଅଫିସ ହତାରେ

ଅନେକ ହାତ ଏବେ ବନ୍ଧା ପଡ଼ିଲାଣି

ଆଉ କୋଉ ସାହି ମୁରବି ପାଖରେ

ଘରଣୀର ଯେତେ ଯାହା ସାଇତା ସମ୍ପତ୍ତି

ଫେରିବା ବାଟ ଯେ ଧରୁନି

କୋଉ ବାପ ଅମଳର କେଶ ପାଇଁ

ଯେଉଁଠି ନିୟମ ଗଡେ ବର୍ଷ ବର୍ଷ

ଫାଇଲ ଫର୍ଦ୍ଦରେ ଅଫିସ ହତାରେ

କିଏ ଦାୟୀ ଏଥି ପାଇଁ

ଯାହା ପାଇଁ ବନ୍ଧା ଅଛି ନିରୀହ ଜୀବନ

ଯାହା ପାଇଁ ପେଟ ସହେ ଭୋକର କଷଣ

ଆଖି ପାଏ ନିର୍ଯ୍ୟାତନା

ନିୟମ ଭୋଗୁଛି କାରାବାସ

ପ୍ରତିକ୍ଷଣ ଫାଇଲରେ ଅଫିସର କାରାଗାରେ ।