ପ୍ରଥମାଷ୍ଟମୀ

ମାର୍ଗଶିର କୃଷ୍ଣ ଅଷ୍ଟମୀ ତିଥିରେ

ପ୍ରଥମାଷ୍ଟମୀ ହୁଏ,

ଗୃହର ପ୍ରଥମ କନ୍ୟା କି ପୁତ୍ର

ନବ ବସ୍ତ୍ରେ ଶୋଭା ପାଏ l

ପିନ୍ଧି ଅଳଙ୍କାର ହାତେ ସଜା ହୋଇ

ଗୃହ ମଧ୍ୟେ ପୂଜା ହୁଏ,

ଷଷ୍ଠୀ ଦେଵୀଙ୍କଠୁ ଆଶୀର୍ବାଦ ପାଇଁ

ମଥା ନଇଁ ଦେଇଥାଏ l

ସବୁ ଅଷ୍ଟମୀରୁ ଏ ଅଷ୍ଟମୀ ସାର

ଦେଇଥାଏ ମନେ ଖୁସି,

ଝିଅ ଅବା ପୁଅ ପିଠା ପଣା ଖାଇ

ଆନନ୍ଦେ ନାଚନ୍ତି ହସି l

କେତେ ଉନ୍ମାଦନେ ପୂର୍ବ ପ୍ରସ୍ତୁତି

ପୁରେ ପୁରେ ଲାଗିଥାଏ,

ହଳଦୀ ପତ୍ରରେ ଏଣ୍ଡୁରି ପିଠାଟା

ମନକୁ ମୋହିଥାଏ l

ମାମୁଁ ଘର ଖୁସି ଆଜି ମିଳିଥାଏ 

ସ୍ନେହ ରହେ ଅପାସୋରା,

ସେଥିପାଇଁ ବୋଧେ ମାମୁଁଘର ଲୋକ

ଅଷ୍ଟମୀ ବନ୍ଧୁଟି ପରା l

ବରଷକୁ ଥରେ ଏ ଓଷା ପଡଇ

ଦେଇ ଅସରନ୍ତି ଖୁସି,

ପରିବାର ବନ୍ଧୁ ମଧ୍ୟେ ମିଠା ସମ୍ପର୍କ

ଆଣିଥାଏ ବେଶି ବେଶି l

ବଡ ଦେଉଳରେ ଜଗା ମଧ୍ୟ୍ୟ 

ଏଦିନ ପଢୁଆଁ ହୁଏ,

ତାର ମାମୁଁଘର ମଥୁରା ନଗରୀ

କେତେ ଦ୍ରବ୍ୟ ଭେଟି ଦିଏ l

ଓଡିଆ ସଂସ୍କୃତି ଓଡ଼ିଆର ପର୍ବ

ମଧୁର ଏ ପରମ୍ପରା,

ବାରମାସେ ତେର ଯାତରା ଲାଗଇ

ସବୁଠୁ ନିଆରା ନିଆରା ।