ପରମ୍ ବ୍ରହ୍ମଙ୍କୁ ଜୀବାତ୍ମାର

କାୟା କାରାଗାରେ ବନ୍ଦୀ ମୁଁ

ପ୍ରଭୁ ଅଖିଳପତି

ବହୁବାର ଜନ୍ମ ଲଭିଣ

ପାଉନାହିଁ ମୁକତି ॥

ନିଜ କର୍ମଫଳ ଭୋଗୁଛି

ମର ଶରୀର ନେଇ

ତ୍ରିତାପରେ ସନ୍ତୁଳିତ ମୁଁ

ମୋତେ ନମିଳେ ତ୍ରାହି ॥

ବ୍ରହ୍ମମୟ ପ୍ରଭୁ ଜଗତ

ବ୍ରହ୍ମଧାମୁ ଆସିଛି

ପ୍ରକୃତି ନିର୍ଦ୍ଦେଶ ପାଳନେ

ଜୀବ ବୋଲାଉ ଅଛି ॥

ବିଷୟା ବିଷରେ ଆବଦ୍ଧ

ହୋଇ ପ୍ରକୃତି ଦୋଷେ

ଅହଂକାରେ କର୍ତ୍ତା ଭାବି ମୁଁ

ବୁଦ୍ଧି ହରାଇ ବସେ ॥

ତୁମେ ପ୍ରଭୁ ମୋତେ ଦେଇଛ

ଦେହ ସଙ୍ଗେ ଇଂଦ୍ରିୟ

ସବୁ କ୍ଷଣସ୍ଥାୟୀ ସଂସାରେ

ହେଉ ବୁଦ୍ଧି ଉଦୟ ॥

ସଦା ବ୍ରହ୍ମବୋଧ ଭାବନା

ସଙ୍ଗେ ଦିବ୍ୟ ଚେତନା

ସାଧୁ ସନ୍ଥଙ୍କର ଚିନ୍ତନ

ମୋତେ ଦେଉ ପ୍ରେରଣା ॥

ନିରାକାର ସର୍ବ ବ୍ୟାପକ

ପ୍ରଭୁ ପରମେଶ୍ୱର

ନିନାଦିତ ହେଉ କର୍ଣ୍ଣରେ

ସଦା ଓଁକାର ସ୍ୱର ॥

ବ୍ରହ୍ମଜ୍ୟୋତି ହେଉ ପ୍ରକାଶ

ମୋର ଆତ୍ମା ମଧ୍ୟରେ

ବ୍ରହ୍ମଲୋକେ ମିଳୁ ଆନନ୍ଦ

ମୃତ୍ୟୁ ଲଭିବା ପରେ ॥

ବେଦମାତା ମୋର ପାଥେୟ

ସେତ ଜ୍ଞାନ ସାଗର

ଅଜ୍ଞାନ ତିମିରୁ ବିଭୁହେ

ମୋତେ ଉଦ୍ଧାର କର ॥

++++++++++++++

[ ହରି ଓଁ ତତ୍ ସ ତ୍ ]