ପ୍ରକୃତିର କିମିଆ

ପ୍ରସ୍ତର ବକ୍ଷରୁ ଝରଇ ଝରଣା

ଝରୁଥାଏ ନିରନ୍ତର

ସବୁଜିମା ଚତୁର୍ଦ୍ଦିଗରେ ତା'ବ୍ୟାପ୍ତ

ସତେ ସବୁଜ ଚାଦର।

ପିତ,ଲୋହିତ,ନୀଳ ଏବଂ ସବୁଜ

ରଙ୍ଗରେ ରଙ୍ଗୀନ ଧରା

ପାହାଡ,ପର୍ବତ,ନଦୀ ଓ ବୃକ୍ଷରେ

ସମଗ୍ର ପ୍ରକୃତି ଘେରା।

ସୁନୀଳ ନଭଟି ତାରକା ଖଚିତ

ମଧ୍ୟ ସ୍ଥଳେ ଚନ୍ଦ୍ର ସୋହେ

ଦିବସେ ତପତି ରାତ୍ରିରେ ଚନ୍ଦ୍ରମା

ସଭିଁଙ୍କର ମନ ମୋହେ।

ଗ୍ରୀଷ୍ମ ପରେ ବର୍ଷା, ଶୀତ ଓ ବସନ୍ତ

ଋତୁଚକ୍ର ଗତିମାନ

ଜୀବନ ଦର୍ଶନର ଶିକ୍ଷା ଦିଅଇ

ଦୁଃଖ ପରେ ସୁଖ ସ୍ଥାନ।

କଷ୍ଟ କରେ ଯିଏ କୃଷ୍ଣଙ୍କୁ ସେ ପାଏ

ଏହା ଅଟେ ଗୁଢ଼ ସତ୍ୟ

ପ୍ରକୃତି ନିୟମ ସର୍ବତ୍ର ସମାନ

ସରଗ ହେଉବା ମର୍ତ୍ତ୍ୟ।