ପ୍ରେମିକା

ଦିନେ ମୁଁ ପ୍ରେମିକା ଥିଲି ତମର

ଚାରିପଟେ ଖୋଲାଥିଲା

ଅନେକ ରାସ୍ତା

ସବୁ ରାସ୍ତାରେ ତମେ ଥିଲ ।

ଥିଲା

ସମୟ ସେପାଖର ତାରୁଣ୍ୟ

ମୃତ୍ୟୁ ନଥିଲା 

ଆମେ ଶୂନ୍ୟରେ ମିଳେଇ ଯାଉଥିଲେ କ୍ରମଶଃ

ଆଉ ଦିନେ ମୁଁ ପ୍ରେମିକା ନଥିଲି ତମର ।

ଅଚାନକ 

ଅନେକ କାନ୍ଥ ଉଠିଗଲା ଚାରିପଟେ

କୋଉଠି ଖୋଲା ନଥିଲା ଦ୍ଵାର

ମୁଁ କ୍ରମଶଃ ହେଉଥିଲି ଜୀର୍ଣ୍ଣଶୀର୍ଣ୍ଣ

ତମେ ଦିଶୁ ନଥିଲ କେଉଁଠି  ।

କେମିତି କେଜାଣି ଅଳ୍ପଦିନ ପରେ 

ଖୋଲିଗଲା ଗୋଟେ ଦ୍ଵାର

ତମେ ନଥିଲ

ମୃତ୍ୟୁ ଥିଲା

ଥିଲା ଅନ୍ଧାର

ମୁଁ ଅପସରି ଯାଉଥିଲି କ୍ରମଶଃ

ଏକା ଏକା ।