ପ୍ରେମିକା
ପ୍ରେମିକା
ତମର ଆସିବାର ଖାଲି ଅପେକ୍ଷା
ଏ ଅକ୍ଟୋବରରେ ଆସ, କର ମୋ ନିମନ୍ତ୍ରଣ ରକ୍ଷା ।
ବୁଲିଯିବା ଖଣ୍ଡଗିରିର ପାହାଡ, ଆଉ ଦେଖାଇବି ଚନ୍ଦକାର ହାତୀପଲ
ଚନ୍ଦ୍ରଭାଗାର ସଙ୍ଗମ ଜଳରେ ଭିଜେଇବି ତବ ତନୁ ପଲ୍ଲବ,
ଆକାଶରେ ଆଙ୍କି ଦେବି ତମ ଛବି,
ସମଗ୍ର ବାୟୁମଣ୍ଡଳରେ ଭରିଦେବି, ରଜନୀଗନ୍ଧାର ବାସ ।
ସନ୍ଧ୍ୟାରେ,ପୁରୀ ସମୁଦ୍ର ବେଳାରେ
ଅଳସ ଜହ୍ନକୁ ଆଣି, ବସାଇବି ତମ ପାଖରେ ।।
କୋଣାର୍କରୁ ଆଣିବି ମୂର୍ତ୍ତି, ଦେବି ତୁମକୁ ଉପହାର
ରେଭେନ୍ସାର ସୂର୍ଯ୍ୟଘଡି ଠାରୁ ଉଦୟଗିରି ର ସ୍ଥାପତ୍ୟ,
ସବୁ ହେବ ତୁମର ।
ନନ୍ଦନକାନନକୁ କରିବି ତମ ବଗିଚା,
ଚିଲିକାକୁ ପୋଖରିଣୀ ।
କୋଇଲି ଗାଇବ ଗନ୍ଧର୍ବର ଗୀତ
ଘର ହେବ ସାରା ରାଜଧାନୀ ।
ଆଉ ଭାବିଛି ବଦଳାଇବି ଋତୁ ଚକ୍ର
ତମ ଗାଧୋଇବା ବେଳ ହେବ ବର୍ଷା ଋତୁ
ଦ୍ୱିପ୍ରହର ହେବ ଶୀତ, ସନ୍ଧ୍ୟାରେ ବହିବ ମଳୟ ପବନ
ଆଉ ରାତିରେ ଦେଖିବ ଶରତ ଜହ୍ନ ।।
ସବୁଦିନ ହେବ ଚାନ୍ଦିନୀ ରାତି ,
ତାରା ସବୁ ହେବେ ବିଜୁଳି ବତୀ,
ଚିଲିକାର ସବୁ ଅମାନିଆ ପକ୍ଷୀ ,ଆସି ରହିବେ ତୁମ ପିଞ୍ଜରାରେ ।
ଗଜ ମୋତିରେ କରିବି ମୁଁ ପାଉଁଜି
ଆଉ ତମ ଦେହ ସାରା ଭରିଦେବି ହାର, କୌସ୍ତୁଭ ମଣିରେ ।।
ଏହା ପରେ ମୁଁ ନାସ୍ତିକ,
କରିବି ତେତିଶ କୋଟି ଦେବତାଙ୍କ ଷୋଡଶ ପୂଜା, କରିବି ପ୍ରାର୍ଥନା ।
ଆଖିରେ ଭରି ପ୍ରେମ,ହାତରେ ଧରି ନାଲି ଗୋଲାପ,
ମୁଁ ହେବି କବିରୁ ପ୍ରେମିକ,
ଆଣ୍ଠୁମାଡ଼ି ମାଗିବି ,ତୁମ ହୃଦୟ
ଦେବ କି ନାହିଁ କୁହ ।।।
ରାକେଶ ରଞ୍ଜନ ବିଶ୍ୱାଳ