ପ୍ରେମ ପାଗଳିନୀ ନଦୀ
ପ୍ରେମ ପାଗଳିନୀ ନଦୀ
ଗିରି କନ୍ଦରୁ ଉଦବୃତ୍ତ ହୋଇ,ଉଚ୍ଛ୍ବସିତ ମନ ନେଇ
ନବ ଜନ୍ମ ପାଇ ଝରି ପଡୁ ତୁ ଚଳଚଞ୍ଚଳ ନିର୍ଝରିଣୀ,
ଶତ ଉତ୍ସାହ, ଆବେଗ ମନେ ନେଇ,ପ୍ରେମ ପାଗଳିନୀ,
ନଦୀ ତୁ,ନିଜ ଲକ୍ଷ୍ୟ ପଥେ ଯାଉ ଆଗେଇ ବାଧା ନ ମାନି ।
ପ୍ରସ୍ତର ଖଣ୍ଡ ସବୁ କେବେ ତୋ ଗତି ପଥ ପାରେନି ରୋକି ,
ଦୁଇ କୂଳ ଖାଇ ପ୍ରଖର ତୋ ସ୍ରୋତଧାର,ତୁ ଯେ ସ୍ରୋତସ୍ବିନୀ ,
ନୂତନ ଆଲୋକ ପରଶେ ,ନବ ନବ ଆଶା ଅନ୍ତରେ ନେଇ,
ନଦୀ, ତୁ ଏତେ ଚଞ୍ଚଳତା ନେଇ କୁଆଡେ ଯାଉ ଯେ ବହି ?
ସାଗର ସାଥେ ମିଳନର ଆଶା ନେଇ, ବ୍ୟାକୁଳ, ଉଦଭ୍ରାନ୍ତ ହୋଇ,
ନିର୍ବିଘ୍ନେ, ନିଜ ପଥ ବାଛି ଯାଉ ଆଗେଇ, ତୃଷିତ ର ତୃଷ୍ଣା ମେଣ୍ଟାଇ,
ଅବଶେଷେ ମହାସାଗର ସାଥେ ମିଶି ନିଜ ସତ୍ତା,ଅସ୍ତିତ୍ବ ଯାଉ ଭୁଲି,
ସତେ କି ପରମାତ୍ମା ସହ ଆତ୍ମା ଅନ୍ତିମ କ୍ଷଣେ ଯାଏ ଲୀନ ହୋଇ ।