ପରଦା -ପରିଧି -ପୃଥିବୀ -ପରିବର୍ତ୍ତନ -ପ୍ରଭେଦ -ପ୍ରଭାବୀ
ପରଦା -ପରିଧି -ପୃଥିବୀ -ପରିବର୍ତ୍ତନ -ପ୍ରଭେଦ -ପ୍ରଭାବୀ
- ପରଦାରେ ଜୀବନ ଏଠି ଆଜି,
ରଙ୍ଗମଞ୍ଚର ନାଟକ ପରି
ପରଦା ପଡିବା ଯାଏ ଖେଳ ଚାଲିଥିବ,
ଅପେକ୍ଷା ନ କରି ତାଳି ବା ଗାଳିର |
- ପରିଧି ସେ ନାଟକର
କେବଳ ସେ ମଞ୍ଚରେ ସୀମିତ,
ଭାଗ୍ୟ ଓ ଭାବନାର ଦୋଛକିରେ
ଚାଲିଛି ତା' ପରିକ୍ରମା ଏ ପୃଥିବୀରେ |
- ପୃଥିବୀରେ ଚାଲିଥିବା ଏ ବିବର୍ତ୍ତନ
ମେଣ୍ଡେଲଙ୍କଠାରୁ ଡାରଉଇନଙ୍କ ଯାଏଁ,
ଏକକୋଷୀରୁ ବହୁକୋଷୀ ଯାଏଁ,
ପରମାଣୁ ଯୁଦ୍ଧରୁ ମହାମାରୀ ଯାଏଁ,
ପୃଥିବୀର ଆବର୍ତ୍ତନ ଓ ପରିକ୍ରମଣ ପରି |
- ପରିବର୍ତ୍ତନର ସଂଜ୍ଞା ଇଏ,
ସ୍ଥିରତାର ନୁହେଁ, ଗତିଶୀଳତାର,
ଆଗକୁ ବଢିବାର, କର୍ମପ୍ରବଣତାର-
ସେ କ୍ରମବର୍ଦ୍ଧିଷ୍ଣୁ ଜନସଂଖ୍ୟାର |
- ପ୍ରଭେଦ କିଛି ତା'ଠି ନାହିଁ,
ବିଶ୍ଳେଷଣ କଲେ ଯଦି,
ମିଳେ ଖାଲି ସୃଷ୍ଟିର ସେ ନିୟମ,
ବନ୍ଧା ଯହିଁ ସସାଗର-ଧାମ, ସସୀମରୁ ଅସୀମ |
- ପ୍ରଭାବୀ ସମସ୍ତେ ଏଠି,
ପ୍ରଭାବିତ ହେଉଅଛୁ ପ୍ରଭାବ ବିସ୍ତାର କରି
ଆପଣାର ପରାକ୍ରମଶୀଳତାର |