ପ୍ରଭୁ ତୁମେ ଗଲ ମାଉସୀ ଘର

ପ୍ରଭୁ ତୁମେ ଗଲ ମାଉସୀ ଘରକୁ

ନନେଇ ମାଆଙ୍କୁ ସାଥୀରେ

ଛାଡି ଚାଲିଗଲ କରି ଏକାକିନୀ

ରହିଲେ ସେ ଶ୍ରୀମନ୍ଦିରେ ॥

ନନ୍ଦିଘୋଷରଥେ ନଥିଲେବି ଜାଗା

ନେଇଥାନ୍ତ ଅନ୍ୟରଥେ

ଏକି ପରମ୍ପରା ସୃଷ୍ଟିକଲ ପ୍ରଭୁ

ନନେଇ ମାଆଙ୍କୁ ସାଥେ ॥

କ୍ରୋଧ ଅଭିମାନେ ହୋଇ ପ୍ରଜ୍ୱଳିତ

ଭାଙ୍ଗିଦେଲେ ନନ୍ଦିଘୋଷ

ନଖୋଲି କବାଟ କଲେ ଅସମ୍ମାନ

କରିବାରୁ ତୁମେ ଦୋଷ ॥

ଭାଇ ଭଉଣୀଙ୍କ ସଙ୍ଗେମିସି ପ୍ରଭୁ

ଖାଇଦେଲ ପୋଡପିଠା

ମନେପଡିଲାନି ମାଆଙ୍କ ପାଇଁକି

ଆଣିବାକୁ ଏକ ଗୋଟା ॥

ତୁମ ଦୋଷ ପ୍ରଭୁ ମାଆ ସାଆନ୍ତାଣୀ

କରିଦେଲେ ସବୁ କ୍ଷମା

ହେଲେ ଭକ୍ତ ଦୋଷ କ୍ଷମା କରିବାକୁ

କାହିଁକି ଶୁଣୁନ ଜମା ॥

ତୁମ ଦୋଷ ଠାରୁ ଭକ୍ତଙ୍କର ଦୋଷ

କେଉଁଗୁଣେ ପ୍ରଭୁ ବଡ

କେଉଁଥି ପାଇଁକି ନିଦାବିଷ୍ଣୁସାଜି

ପାଲଟି ଯାଇଛ ଜଡ ॥

(ସଦାନନ୍ଦ ପ୍ରତିହାରୀ )

ତା୩୦-୦୭-୨୦୧୮