ଫଗୁଣ ଗୋ ତୁମେ

ଫଗୁଣ ଗୋ ତୁମେ ଗୋଧୂଳି ଲଗ୍ନରେ

ଋତୁ ପାଣିଗ୍ରହଣର

ନବବଧୂ ପାଇଁ ସିନ୍ଥିରେ ସାଇତା

ସ୍ବର୍ଗୀୟ ସିନ୍ଦୂର ଗାର ।।

ଫଗୁଣ ଗୋ ତୁମେ ନିଃସଙ୍ଗ ରାତ୍ରିରେ

ସ୍ମୃତି ତାଜମହଲର

ପ୍ରେମିକାଟେ ପାଇଁ ଅଧରରେ ଅଙ୍କା

ଦାଗ ମିଠା ଚୁମ୍ବନର ।।

ଫଗୁଣ ଗୋ ତୁମେ ପାହାନ୍ତି ପ୍ରହରେ

ଶିଖା ମହମବତୀର

କୁଆଁରୀର ପାଇଁ ନିରୀହ ଆଖିରେ

ସ୍ୱପ୍ନ ଶଙ୍ଖା ସିନ୍ଦୂରର ।।

ଫଗୁଣ ଗୋ ତୁମେ ଅଳସି ସଞ୍ଜରେ

ଦୀପ ଏକ ଚଉରାର

ସଧବାଟେ ପାଇଁ ମମତାରେ ଭରା

ସ୍ରୋତ ଶାଶ୍ୱତ ପ୍ରେମର ।।

ଫଗୁଣ ଗୋ ତୁମେ ନିଶାର୍ଦ୍ଧ ବେଳାରେ

ଅନଳ ଯେ କାମନାର

ଦେହଜୀବୀ ପାଇଁ ତୃଷ୍ଣା ମେଣ୍ଟୁଥିବା

ବାରିଧାର ମୌସୁମୀର ।।

ନାମ-ପ୍ରଶାନ୍ତ କୁମାର ପଧାନ

ଗ୍ରାମ-ବୁରୋମୁଣ୍ଡା

ଜିଲ୍ଲା-ବରଗଡ