ଫଗୁନ୍ ଆସୁଛେ

ଲାଲ୍ ଜରଜର୍

ପଲସା ଫୁଲ୍ ଦିସୁଛେ

ଧରତି ମାଁ ମୁଲୁର୍ ମୁଲୁର୍

କେଡେ ସୁନ୍ଦର ହସୁଛେ

ଫଗୁନ୍ ଆସୁଛେ ହୋ

ଫଗୁନ୍ ଆସୁଛେ ।।

ଆମ୍ ବାଉଲ ମହମହ

ମହକି ଯାଉଛେ

କୋଇଲି କୁହୁକୁହୁ

କେତେ ସୁରେ ଗୀତ୍ ଗାଉଛେ

ଫଗୁନ ଆସୁଛେ ହୋ

ଫୁଗୁନ୍ ଆସୁଛେ ।।

ଇ ଫୁଲ୍ ନୁ ସେ ଫୁଲ୍କେ

ଭମର୍ ଉଡି ବୁଲୁଛେ

ରସାଲି ଲହରମନି ମୁଡେ

ମଲୀ ଫୁଲ୍ ଖୁଚିଛେ

ଫଗୁନ୍ ଆସୁଛେ ହୋ

ଫଗୁନ୍ ଆସୁଛେ ।।

ଫଗୁନର୍ ରଙ୍ଗେ ନନି

ରଙ୍ଗେଇ ହେଇଛେ

ଗୁଡେ ବାନ୍ଧି ପାଏଁରୀ

ପ୍ରେମ୍ ସୁରେ ନାଚୁଛେ

ଫଗୁନ୍ ଆସୁଛେ ହୋ

ଫଗୁନ୍ ଆସୁଛେ ।।

ଡିସମ୍ୱର ମେହେର

ଗଣ୍ତାବାହାଲି