ପାଶବିକତାର ମୌସୁମୀ ପ୍ରବାହ

ପାଶବିକତାର 

ମୌସୁମୀ ପ୍ରବାହ

ତୀବ୍ର ଆଜି ସମାଜରେ 

ସ୍ନିଗ୍ଧ ଶୀତଳ 

ପୁଣ୍ୟ ଛାୟାତଳ

ଅପସୃତ ମହୀତଳେ ।

ପାପର ପ୍ଳାବନେ 

ସିକ୍ତ ମାନବର

ଜ୍ଞାନ ,ବୁଦ୍ଧି ଓ ବିବେକ,

କାମାନ୍ଧ ପୁରୁଷ ଚିହ୍ନେନି

କେ ଜାୟା କିଏ ବା ଭଗିନୀ

ହୁଏନି ଦୟା ଉଦ୍ରେକ ।

ହିଂସ୍ର ବନ୍ୟ ପଶୁ 

ମନେ ଜାଗେ ଦୟା 

ଜାଣିପାରୁଛି ସେ 

କିଏ ଶିଶୁ ଆଉ

କିଏ ତା ଶିକାର ଯୋଗ୍ୟ,

କାମାନ୍ଧ ପୁରୁଷ ବାସନା ପ୍ରଭାବେ

ଭୁଲିଯାଏ ଆଜି 

କିଏ ତାର ଉପଭୋଗ୍ୟ ।

ନଗ୍ନ ଆଦିମତା 

ଆପଣେଇ ନିଏ 

ଆଜି ପଥଭ୍ରଷ୍ଟ ଯୁବା,

ଇନ୍ଦ୍ରିୟ ଲାଳସା 

ନିୟନ୍ତ୍ରଣହୀନ

କ୍ଷୀଣଆଶା ସୁଧୁରିବା ।

ରାଜରାସ୍ତା ପରେ 

ନାରୀ ବଳାତ୍କାର 

ଜନତା ମୂକ ଦର୍ଶକ

ନିରୁପାୟ ପତି 

ଚିତ୍କାର କରଇ

ଶୁଭେନି କାହାକୁ ଡାକ ।

ବିପଦ ବେଳରେ 

ଦେଖି ନଦେଖିଲା ପ୍ରାୟ

କିଛି ଲୋକ ଏଠି

ସାହାଯ୍ୟର ହାତ ଦୂରେ ଥାଉ

ଚାଲି ଯାଇଥାନ୍ତି ବାଟ କାଟି ।

ବଳାତ୍କାର ପରେ ଜୀବନ୍ତ ଦଗ୍ଧ

ହେଉଅଛି ନାରୀ ଏଠି

ବଳାତ୍କାରୀ ବି ସ୍ୱାଧୀନ ଏଠାରେ

ନାରୀ ସୁରକ୍ଷା କେଉଁଠି ।

ଫେରିଯିବା ଆମେ 

ଆଉଥରେ କ'ଣ 

ସେହି ଆଦିମ ଯୁଗକୁ

ନଗ୍ନ ପଶୁ ସମ ଆଚରଣ

ଶିଖାଇବା ଉତ୍ତରପିଢିକୁ ।