ଓଁ ନମଃ ଭଗବତେ ବାସୁଦେବାୟ
ଓଁ ନମଃ ଭଗବତେ ବାସୁଦେବାୟ
ଅଭ୍ୟାସ କର ମନ ନିତ୍ୟ, ଶ୍ରୀମଦ ଭାଗବତ l
ଅଜ୍ଞାନତା ଯିବ ଏ ଗ୍ରନ୍ଥ ପଠନେ
ଭାଗବତ ସିନା ପରମ ଶାସ୍ତ୍ର l00l (ଘୋଷା )
ବ୍ୟାସଦେବ କଲେ ରଚନା ନାରାୟଣ ଯଶ ବର୍ଣ୍ଣନା
ଜଗନ୍ନାଥ ଦାଶ ପ୍ରାକୃତ ଭାଷାରେ
ଦ୍ୱାଦଶ ସ୍କନ୍ଧକୁ କଲେ ପ୍ରଣୀତ l01l
ଆଦ୍ୟ ବେନି ସ୍କନ୍ଧର ଗାଥା ଭାଗବତ ଆଗତ କଥା
ତୃତୀୟେ ବ୍ରହ୍ମାଣ୍ଡ ସର୍ଜନା ଚତୁର୍ଥେ -
ଧ୍ରୁବ ତପେ ଧ୍ୟାୟୀ ଅଜପା ମନ୍ତ୍ର l02l
ପଞ୍ଚମେ ଭ୍ରାତ ନୃପମଣି ସାତପୁତ୍ରେ ବାଣ୍ଟି ଧରଣୀ
ଷଷ୍ଠେ ନାରାୟଣ ନାମ ଉଚ୍ଚାରିଣ
ପାପୀ ଅଜାମ୍ବିଳ ହେଲା ମୁକତ l03l
ସପ୍ତମେ ପ୍ରହଲ୍ଲାଦ ଜନ୍ମ ହିରଣ୍ୟ -ଅକ୍ଷ ବିଦାରଣ
ଅଷ୍ଟମେ ସାଗର ହୋଇଲା ମନ୍ଥନ
ଗଜ ମକର ର ଯୁଦ୍ଧ ଚରିତ l04l
ବଂଶାନୁକ୍ରମିକ ନବମ ଦଶମେ ଗୋବିନ୍ଦ ଜନମ
ଗୋପ ବୃନ୍ଦାବନ ମଥୁରା ଦ୍ୱାରିକା
କହ୍ନାଇ ଅଦ୍ଭୁତ ଲୀଳା ବର୍ଣ୍ଣିତ l05l
ଏକାଦଶେ ଷଡ଼ ସମ୍ବାଦ ତତ୍ତ୍ୱ ଅର୍ଥ ହୋଇଲା ଭେଦ
ଦ୍ୱାଦଶ ସ୍କନ୍ଧରେ ପରୀକ୍ଷିତ ଆଗେ
ଶୁକ ବିହିଲେ ଭବିଷ୍ୟ ଆଗତ l06l
କହିଲା ଦୀନ ପ୍ରେମାନନ୍ଦ ଭାଗବତ ଦ୍ୱାଦଶ ସ୍କନ୍ଧ
ଅଭ୍ୟାସ ରେ ମନ ଚିନ୍ତି ଚଇତନ
ଦଣ୍ଡି ନପାରିବ ମାର୍ତ୍ତଣ୍ଡ ସୁତ l07l