ଓଲଟ ପାଲଟ

ଉତ୍ତରୁ ବହୁଛି ଦକ୍ଷିଣା ପବନ

ମନ ପୁଲକିତ କରି,

ନିଶିରେ ଉଦୟ ଦିବାକର ଆହା

ଅନ୍ଧାରକୁ ଦୂର କରି ।

କବିର ଅଭାବ ଭାବ ରହିଅଛି

ଅଭାବୁକ ଭାବେ ବେଶୀ,

ନିର୍ଦ୍ଧନ ଦେଉଛି କୋଟି ଉପହାର

ଧନୀ ଦେଖୁଅଛି ବସି ।

ବିଦ୍ଵାନ ପାଖରେ ଜ୍ଞାନର ଅଭାବ

ବୁଝେ ନାହିଁ ଜମା କିଛି,

ନିରକ୍ଷର ବାଣ୍ଟେ ଜ୍ଞାନର ଭଣ୍ଡାର

ଅବନା ପାଠରେ ମଜ୍ଜି ।

ନାରୀ ତ ପିନ୍ଧଇ ପୁରୁଷ ବସନ

ନିଜକୁ ପାରୁନି ଜାଣି,

ଅଲାଜୁକ ଠାରେ ଲଜ୍ଜାର ଲକ୍ଷଣ

ଲାଜୁକର ଲଜ୍ଜା ନାହିଁ ।

ଉତ୍ତରୁ ବହିଲେ ଦକ୍ଷିଣା ପବନ

ମନ ପୁଲକିତ ହେବ,

ଦକ୍ଷିଣ ଉତ୍ତାରୁ ଉତ୍ତରା ବହିଲେ

ଶରୀର ଯେ କ୍ଷୀଣ ହେବ ।

ଉତ୍ତରା ଦକ୍ଷିଣା ଯେବେ ମିଶିଯିବ

ଦିନରେ ଅନ୍ଧାର ଘୋଟିବ,

ପାଦପଟେ ଜନ୍ମ ଓଲଟା ପ୍ରକାର

ନିୟତି ଇଛାରେ ହେବ ।