ଓଡ଼ିଆ ଜାତିର ପ୍ରାଣ ଦେବତା

ଓଡ଼ିଆର ତୁମେ ଆତ୍ମ-ପରିଚୟ

ଓଡ଼ିଆର ସ୍ୱାଭିମାନ,

ଓଡ଼ିଆ ଜାତିର ହେ ଗର୍ବ-ଗୌରବ

ଓଡ଼ିଆର ଯଶ-ମାନ ।

ଓଡ଼ିଆର ତୁମେ ପ୍ରାଣନ ସ୍ପନ୍ଦନ

ବିଜୟ-ଚନ୍ଦନ ଟୀକା

ଓଡ଼ିଆ ମନର ଆଶା ଓ ଭରଷା

ବିଶ୍ଵାସର ଦୀପ୍ତି ଶିଖା ।

ଓଡ଼ିଆର ଚିନ୍ତା ଚେତନାରେ ତୁମେ

ହସ ଲୁହର ଯେ ସାଥି

ଓଡ଼ିଆର ଜ୍ଞାନ-ଦର୍ଶନରେ ତୁମେ

ନିତ୍ୟ ସୁଧା ପ୍ରେମ-ଭକ୍ତି ।

ଓଡ଼ିଆ ସାହିତ୍ୟେ ତୁମେ ମୁକ୍ତା-ମଣି

ଶାବ୍ଦିକ ଛନ୍ଦ ବିଳାଶ

ଓଡ଼ିଆର ପ୍ରତି ସୃଜନୀରେ ତୁମେ

ଲାଳିତ୍ୟ ମଧୁର ରସ ।

ଓଡ଼ିଆର ତୁମେ ଶରଣ ରକ୍ଷଣ

ଉତ୍କଳ ରାଜାଧିରାଜ

ଓଡ଼ିଆ ଆତ୍ମାର ହେ ନିର୍ବାଣ ଦାତା

ମୋକ୍ଷ ତୁମ ପଦରଜ ।

ଓଡ଼ିଆର ବେଶ ଭୂଷଣରେ ପ୍ରଭୁ

ତୁମ ଶ୍ରୀଅଙ୍ଗ ସଜ୍ଜିତ

ଓଡ଼ିଆ ହାତର ଭୋଜନକୁ ଖାଇ

ନିତ୍ୟ ତୁମେ ଉଲ୍ଲସିତ ।

ଓଡ଼ିଆ ରାଇଜେ କରିଅଛ ଘର

ଓଡ଼ିଆର ପ୍ରଭୁ ହୋଇ

ଓଡ଼ିଆ ମାଟିକୁ କରିଛ ପବିତ୍ର

ଆହେ ବ୍ରହ୍ମାଣ୍ଡ ଗୋସାଇଁ ।

ଓଡ଼ିଆର ତୁମେ ଜୀବନ୍ତ ଠାକୁର

ଜାତିର ଜୀବନ-ଗାଥା

ଓଡ଼ିଆ ଅତୀତ ଇତିହାସ ସାକ୍ଷୀ

କହିଯାଏ ତୁମ କଥା ।

ଓଡ଼ିଆର ଇଷ୍ଟ, ଜୀବନ ଆଧାର

ନାଥ ତୁମେ ନାରାୟଣ

ଓଡ଼ିଆର ମାନ ରଖିବା ପାଇଁ ହେ

କଲ କାଞ୍ଚି ଅଭିଯାନ ।

ଓଡ଼ିଆ ଜାତିକୁ ଶଙ୍ଖରେ ପୁରାଇ

ରଖ ଚକ୍ର ଆଢ଼ୁଆଳେ

ଓଡ଼ିଆର ପ୍ରାଣ ନିତ୍ୟ ପାଉ ସ୍ଥାନ

ତୁମ ଚରଣ କମଳେ।

ଓଡ଼ିଆ ମୁଁ ଜଣେ ଧନ୍ୟ ହୋଇଅଛି

ଓଡ଼ିଶାରେ ହୋଇ ଜାତ

ଓଡ଼ିଆର ପ୍ରିୟତମ ଜଗନ୍ନାଥ

ତୁମ ପାଦେ ପ୍ରଣିପାତ ।

ଓଡ଼ିଆ ଜାତିର ପ୍ରାଣର ଦେବତା

କରୁଛି ଏହି ପ୍ରାର୍ଥନା

ଓଡ଼ିଆ ମାଟିରେ ନିତ୍ୟ ଉଡୁ଼ଥାଉ

(ତୁମ) ପତିତପାବନ ବାନା ।

ରଚନା :- ବିଜୟ କେତନ ସାହୁ