ନୂଆଁ ବର୍ଷର ଅନୁଭୂତି

ଦିନ ବଦଳିଲେ ମାସ ବି ବଦଳେ

ବର୍ଷ ବି ବଦଳିଥାଏ

ସମୟ ସ୍ରୋତରେ ଦିବସ-ରଜନୀ

ପରିବର୍ତ୍ତନ ବି ହୁଏ ।

ଋତୁଚକ୍ର ସହ ପ୍ରକୃତିର ଚିତ୍ର

କ୍ରମରେ ବଦଳିଥାଏ

ସମୟାନୁକ୍ରମେ ସକଳପ୍ରାଣୀଙ୍କ

ସ୍ଥିତି ବି ବଦଳିଯାଏ ।

ଜଳସ୍ରୋତ ପରି ମାନବର ଆୟୁ

ହୁଏ କାଳ କବଳିତ

ବୟସ ବୃଦ୍ଧିରେ ଆୟୁ କ୍ଷୀଣ ହୁଏ

ସମୟ ଯେ ଅଣାୟତ ।

ବୟସାନୁଯାୟୀ ଥାଏ ଅନୁଭୁତି

ପ୍ରତିବ୍ଯକ୍ତି ବିଶେଷର

ଅଙ୍ଗେନିଭା କଥା ମାନସପଟଳେ

ସ୍ମୃତି ହୋଇଥାଏ ତା'ର ।

ଅତୀତର ବହୁ ପୁରୁଣା ଘଟଣା

ସୁଖଦୁଃଖ ଅନୁଭୂତି

ତିକ୍ତ-ମଧୁର ନୂଆଁ ଅନୁଭବ

ହୁଏ ସ୍ମୃତି ଓ ବିସ୍ମୃତି ।

ବର୍ତ୍ତମାନର ନୂତନ ଅନୁଭବ

ହୁଅଇ ତାହା ଅତୀତ

ଇତି ବୃତାନ୍ତ ଯେ ହୁଏ ଇତିହାସ

ଭାବିଲେ ଲାଗଇ କଷ୍ଟ ।

ନୂତନ ବର୍ଷର ଅୟମାରମ୍ଭ ଯେ

ହେବ ନବ ଅନୁଭବ

ଅନୁଭୂତି ଯାହା ନୁହେଁ ସ୍ଵତନ୍ତ୍ରତା

ଭବିଷ୍ୟତେ ଯାହା ହେବ ।

ଆଶା-ଆକାଂକ୍ଷାର ନବ ଉଦ୍ଦୀପନା

ମନେ ଆଣିଛି ବିଶ୍ବାସ

ତଥାପି ମନରୁ କରୋନା ସଙ୍କଟ

ମନକୁ କରୁଛି ତ୍ରାସ ।

ନାହିଁ ସୁଖ ଅବା ଦୁଃଖ ଅନୁଭବ

ହୋଇଛି ନବ ବର୍ଷରେ

ବିଗତର ସବୁ ତିକ୍ତ ଅନୁଭୂତି

ନ ରହୁ କାହା ମନରେ ।

ସ୍ମୃତି ବିସ୍ମୃତିର ବହୁ ଅନୁଭୁତି

ଦେଉ ଦୁଃଖ ଅବା ସୁଖ 

ତଥାପି ମନୁଷ୍ୟ ଜୀବନଯାତ୍ରରେ

ନ ହେଉ କେବେ ବିମୁଖ ।

ସଂସାର ପାଦପେ ସୁଖ-ଦୁଃଖ ନାମେ

ଫଳିଅଛି ଦୁଇ ଫଳ

ସୁଖର ଫଳଟି ଅତୀବ ମଧୁର

ପିତା ଲାଗେ ଦୁଃଖ ଫଳ ।

ବିଧିଙ୍କ ନିର୍ଦ୍ଦେଶେ କର୍ମ ଅନୁସାରେ

ଉଭୟ ଭୁଞ୍ଜଇ ନର

ଯେଉଁ ଅନୁଭୁତି ହୁଏ ଯେତେବେଳେ

ତାହାହିଁ ଶ୍ରେୟ ଯେ ତା'ର ।

ନୂତନ ବର୍ଷର ନୂଆଁ ଅନୁଭୁତି

ଦେଉ ସମସ୍ତଙ୍କୁ ଖୁସି

ଅନୁଭବ କରି ସୁଖ ଅନୁଭୂତି

ପ୍ରସନ୍ନ ହୁଅନ୍ତୁ ହସି ।