ନୂଆବର୍ଷ-୨୦ ୨୧

ନୂଆବର୍ଷ ଆସିଛି

ବ୍ୟବସ୍ଥାର ଅକ୍ଟୋପସୀ ବନ୍ଧନରେ ବିବେକ ଦଂଶନରେ

ଅସହାୟତାର ନିତ୍ୟ ନୂତନ ପରିଭାଷାରେ

ଆତ୍ମସମର୍ପଣର ନିର୍ଲଜ ଶୃଙ୍ଗାରରେ ।

ନୂଆ ବର୍ଷ ଆସେ

ଭାରାକ୍ରାନ୍ତ ମଣିଷର ପ୍ରଶାନ୍ତର ପ୍ରଲେପରେ

ଆନନ୍ଦ ଉତ୍ସାହ ଭରା ମଧୁମୟ ପରିବେଶରେ

ସର୍ବମଙ୍ଗଳମ୍ବର ବୀଜ ମନ୍ତ୍ରରେ –

ନୂତନ ଆତିଥେୟତାରେ ।

ନୂଆବର୍ଷ ଆସିଛି।

କୁଢ଼ କୁଢ଼ ଶବଙ୍କ ସମାହାରରେ – ପରବତ ଶେଷକୃତ୍ୟରେ

ଆତ୍ମୀୟଙ୍କ ଅଛୁଆଁ ବାସନ୍ଦ ମନୋଭାବରେ

ସମ୍ପର୍କର ଅଜବ୍ ଅନାବରଣରେ – ସମୀକରଣରେ ।

ନୂଆବର୍ଷ ଆସିଛି

ଲଡାଉନ୍ ଓ ସଟ୍ ଡାଉନର ପୁନଃପୌନିକ ପୃଷ୍ଠଭୂମିରେ

ସଙ୍ଗରୋଧ, ଆବଦ୍ଧାଞ୍ଚଳ ପରି ଅଦ୍ଭୁତପୂର୍ବ ବ୍ୟବସ୍ଥାରେ

ସାମାଜିକ ଦୂରତ୍ୱ ଓ ବିଶୋଧନର ବାଧ୍ୟବାଧକତାରେ ।

ନୂଆବର୍ଷ ଆସିଛି

ଭକ୍ତଶୂନ୍ୟ ରଥଯାତ୍ରା, ଦର୍ଶକ ଶୂନ୍ୟ କ୍ରୀଡ଼ା ପ୍ରତିଯୋଗିତାରେ

ଭକ୍ତଶୂନ୍ୟ ଦଶହରା ଓ ଦୀପାବଳୀରେ

ଭକ୍ତଶୂନ୍ୟ ଦେବାଳୟ ଓ ପ୍ରାର୍ଥନା ପୀଠରେ ।

ନୂଆବର୍ଷ ଆସିଛି

କଟକଣାମୁକ୍ତ ଜୀବନଯାତ୍ରାରେ

ସର୍ବତ୍ର ପରିବ୍ୟାପ୍ତ ଏକ ଖାଁ ଖାଁ ଭାବରେ

ଅଖଣ୍ଡ ନିରବତା ଓ ନିଶୁନ୍ ମାହୋଲିର ରାଜୁତିରେ ।

ନୂଆବର୍ଷ ଆସିଛି

ହୃଦୟର ଅନ୍ତରତମ ପ୍ରଦେଶରୁ

ଭାବନାର ଅଭିବ୍ୟକ୍ତିରେ - କବିତାରେ

ସଦା ସର୍ଜନଶୀଳ କଳ୍ପନା ପ୍ରବଣତାରେ

ସ୍ମୃତି, ଅନୁଭୂତି, ଭାବ ଓ ଚିତ୍ରର ସୁନ୍ଦର ସମ୍ମିଶ୍ରଣରେ ।

ନୂଆବର୍ଷ ଆସିଛି

କରୋନା କବଳିତ ବିଶ୍ଵବାସୀଙ୍କ ଶଙ୍କା, ସଂଶୟ ଓ ଆଶଙ୍କାରେ

ଅନୁଭୂତ ଦୁଃଖ, ଯନ୍ତ୍ରଣା ଓ ଯାତନାରେ

ମୃତ୍ୟୁ ଚେତନା ଜୀବନ୍ତ ହେବାର ଦୁଃଖଦ ବେଳାରେ ।

ନୂଆବର୍ଷ ଆସିଛି

ଚିକିତ୍ସା ବିଜ୍ଞାନର ଜୟଯାତ୍ରାରେ – କରୋନା ଟୀକାରେ

ବିଶ୍ଵ ମହାମାରୀର ବିଶଲ୍ୟକରଣୀରେ

ଜୀଜୀବିଷା ଓ ଜିଜ୍ଞାସାର ପୁନଃ ସଂସ୍ଥାପନରେ ।