ନୂଆ ସଂସାର
ନୂଆ ସଂସାର
ବିଶାଳ ସାଗର ଅସୀମ ଗଗନ
ନଭଚୁମ୍ବି ଗିରିବର,
ଧୂସର ବଉଦ ମଳୟ ପବନ
ପ୍ରକୃତିର ଅଟେ ଘର ।
ଧରଣୀ ବୁକୁରେ ସବୁଜ କାନନ
ଶୁଭେ ପଶୁପକ୍ଷୀ ସ୍ୱର,
ବହୁଛି ତଟିନୀ ଗାଉଛି ଭ୍ରମର
ଦୃଶ୍ୟ ଅତି ମନୋହର ।
ସୁଖ ଦୁଃଖ ଭରା ମଣିଷ କାହାଣୀ
ନୁହଁ କିଛି ଏଠି ସ୍ଥିର,
ଖାଲି ହାତ ନେଇ ଆସିଥିଲୁ ତୁହି
ପୁଣି କାହିଁ ଏତେ ଡର ।
ଭକତିରେ ଭରୁ ହୃଦୟର ମୁଣି
ପ୍ରେମର ଉଠୁ ଜୁଆର,
ସୀମିତ ସମୟ ଜୀବନର ଖେଳ
ତୁଣ୍ଡେ ଥାଉ ହରିହର ।
ପ୍ରେମ କାରାଗାରେ ବନ୍ଦୀ ଏ ଜୀବନ
କେହିନୁହଁ ଏଠି ପର,
ସଂପର୍କ ବନ୍ଧନ ବାନ୍ଧି ଦେଇ ଆମେ
ସହି ଯିବା ଦୁଃଖ ଭାର ।
ସେନେହ ଡୋରୀରେ ଛନ୍ଦି ଯାଇ ସବୁ
ଭୁଲିଯିବା ଅହଂକାର,
ମାନବ ପଣିଆ ଧ୍ବଜା ଧରି ହାତେ
ଗଢ଼ିବା ନୂଆ ସଂସାର ।