ନୂଆ ନୂଆ ଲାଗେ

ବଦଳିବ ସିନା କ୍ୟାଲେଣ୍ଡର ପୃଷ୍ଠା

    ବଦଳିବ ସିନା ବାର,

ବଦଳି ଯିବକି ବଞ୍ଚିବାର ରାହା

    ଚଲା ପଥ ଜୀବନର।।

               ପୁରୁଣା ରହିବ ପରିଚୟ ପୁଣି

                  ପୁରୁଣା ସେଇ ଠିକଣା,

               ନୂଆ ମଲାଟର ଆଡୁଆଳେ 

                  ବହି ଫରଦ ଥିବ ପୁରୁଣା।।

ପୁରୁଣା ସୁବାସ କୁସୁମରେ ଭରା

  ପୁରୁଣା ମଧୁପ ଗୀତି,

ନୂଆ ସକାଳର ଘାସ ଗାଲିଚାରେ

  ପୁରୁଣା କାକର ମୋତି।।

               ନୂଆ ନୂଆ ସିନା ସୂରୁଜ କିରଣ

                ପୁରୁଣା ଧରିତ୍ରୀ ଅଙ୍କ,

               ନୂଆ ଆଶା ନୂଆ ସପନର ଛବି

                ପୁରୁଣା ବ୍ୟାଧି ଆତଙ୍କ।।

ବଦଳି ଯିବକି ମହାମାରୀ ଭିତି

  ଆସିବ ନୂଆ ସକାଳ,

ନୂଆ ବରଷରେ ନୂଆ ଆଶା ନେଇ

  ରହିଛି ବିଶ୍ୱ ସକଳ।।