ନୂଆ ବର୍ଷ ଆସୁଛି

ନୂଆ ବର୍ଷ ଆସୁଛି

ଆସିବାଟା ତ୍ ସୁନିଶ୍ଚିତ

ରାତି ପାହି ପାହି ଆସୁଛି

ସକାଳର ପ୍ରତିକ୍ଷାରେ ସମସ୍ତେ 

ବୁଢୀଆଣୀଟିଏ ବସା ବାନ୍ଧୁଛି

ଇତିହାସର ମଲାଟରେ  

ସମ୍ଭାବନାର ଡେଣା କଅଁଳୁଛି

ସାଁବାଳୁଆରୁ ଜନ୍ମ ନେଉଛି ପ୍ରଜାପତିଟିଏ ।

କୁହୁଡିର ଚାଦର ଢାଙ୍କି 

ବେଶ ଆରାମେ ଶୋଇଯାଇଛି 

ଗାଁ ଆଉ ସହର

ଇନ୍ଦ୍ରଧନୁର ବର୍ଣ୍ଣିଳ ଛାତିରେ

ସୁରାଭର୍ତ୍ତି ଲାଲ ଆକାଶେ

ପ୍ରତିଛବି ଆଙ୍କିହୁଏ ରମ୍ଭା ଆଉ ମେନକାର ।

ଦ୍ଵାରିକା ଯିବାକୁ କୃଷ୍ଣମାନେ ପ୍ରସ୍ତୁତ 

ଅସହିଷ୍ଣତାର ଦ୍ଵାହି ଦେଇ

ଛାଡି ନିଜ ଧାମ ଗୋକୁଳ 

ସମାଜର ଚକ୍ରବ୍ୟୁହରେ

ଫସିଯାଏ କିନ୍ତୁ ବିଚରା ଅଭିମନ୍ୟୁଟିଏ

ପୁଞ୍ଜିବାଦୀ ସପ୍ତରଥୀଙ୍କ ସାମ୍ନାରେ ।

ଥୁରୁ ଥୁରୁ କମ୍ପନେ ଖୁଁ ଖୁଁ କାଶିକାଶି

ଛିଣ୍ଡା କନ୍ଥାକୁ ଜାବୋଡି

ଜାକି ଜୁକି ରାତି କାଟୁଥିବା ଅଣନିଶ୍ଵାସ ଲୋକଟାର 

କଣ ବା ଯାଏ ଆସେ 

ତୁମ ଆସିବା ନ ଆସିବାରେ। ।

କିଛି ଫରକ ପଡିବେ ତାକୁ

ଭୋକ ଆଉ ଭେକ ଅଭାବୀ ଅକୁହା କୋହର  

ବେଶ ଠେକା ବାନ୍ଧି ଚାଲେ ଅନ୍ଧାର ଗଳିରେ 

ଗାଇ ଜୀବନର ଗୀତ

ଭଙ୍ଗା ଚୁଡିର ଲାଲ ଅଶ୍ରୁରେ 

ବତରୁଥାଏ  ତାର ଉଜୁଡା କ୍ଷେତ ।

ଗଣତନ୍ତ୍ର ଏଠି ଆତ୍ମହତ୍ୟା କରେ

ପ୍ରତିଶ୍ରୁତିର ଦଉଡିରେ

ରକ୍ତମାଂସ ଶୋଷି ଦିନରେ ସ୍ଵପ୍ନ ଦେଖାଏ 

ଟେକି ଦିଏ ଦଲାଲ ହାତେ

ମାଳ ମାଳ ଯୋଜନାର ମରିଚିକା ଦେଖାଇ

ଦଉଡାଉ ଥାଏ ସ୍ଵପ୍ନ ମାନଙ୍କୁ

ଚମତ୍କାର ଅଭିନୟ କରିହୁଏ ପରଦା ସାମ୍ନାରେ ।

ଭୋକ ହାତେ ସଦା ହତିଆର

ସାମ୍ୟବାଦର ସଂକଳ୍ପ ନେଇ

ଜଗିବସିରହିଥାଏ ରାତିରାତି

ଏନ୍ତୁଡିଶାଳାରୁ ମଶାଣୀ ଭୁଇଁ ଯାଏଁ

କାଳେ କେହି ଜଣେ ଆସିବ

ତାପାଇଁ ନୂଆ ସକାଳଟିଏ ନେଇ  ।