ନମଃ ଲକ୍ଷ୍ମୀନାରାୟଣ

ନମଃ ଲକ୍ଷ୍ମୀନାରାୟଣ ବଇକୁଣ୍ଠ ବାସୀ l

ବିକୁଣ୍ଠ ଚିତ୍ତରେ ବୈକୁଣ୍ଠରେ ଅଛ ବସି ll

ହସ୍ତଯୋଡ଼ି ବିନତାନନ୍ଦନ ଆଗେ ଉଭା l

ଲକ୍ଷ୍ମୀନାରାୟଣ ମୂର୍ତ୍ତି ଉପମା କି ଦେବା? 

ଫଣା ବିସ୍ତାରି ଅଛନ୍ତି ନାଗ ଶେଷଦେବ l

ତ୍ରେତୟା ଲକ୍ଷ୍ମଣ ଦ୍ୱାପରରେ ବଳଦେବ ll

ପାଦ ଚାପୁଛନ୍ତି ମାତା ଲକ୍ଷ୍ମୀ ଠାକୁରାଣୀ l

ଜଗତେ କାହିଁ ଅଛନ୍ତି ତା' ପରି ଘରଣୀ ll

ସାଗର ମନ୍ଥନେ ମାତେ ଜନମ ଲଭିଲେ l

ଶ୍ରୀହରିଙ୍କ କୋଳମଣ୍ଡି ଜଗତ ମୋହିଲେ ll

ରତ୍ନାକର ରାଜଜେମା ବହୁ ରତ୍ନେ ଭୁଷା l

ବନ୍ଦନା କରୁଛି ମାଆ କାଳ ଏହି ଉଷା ll

ପଦ୍ମପୁଷ୍ପେ ବାସ ମାତ ମାଆ ପଦ୍ମାଳୟା l

ଦୀନ ଦୁଃଖୀଜନେ ସଦା ରଖୁଥିବୁ ଦୟା ll

ହରିପ୍ରୀୟା କର ଦୟା ମାଆ କମଳିନୀ l

ପଦ୍ମ ପୟରେ ଆଶ୍ରୟ ଜଗତର ପ୍ରାଣୀ ll

ଅନ୍ନପୂର୍ଣ୍ଣା ଲୋକମାତା ଜଗତ ଜନନୀ l

ପଦ୍ମା କ୍ଷୀରାବ୍ଧିତନୟା ରମା ନାରାୟଣୀ ll 

ଶ୍ରୀପିଠେ ସୁରପୂଜିତ ଶ୍ରୀମନ୍ଦିରେ ବିଜେ l

ଲକ୍ଷ୍ମୀନାରାୟଣ ପାଦପଙ୍କଜେ ମୁଁ ଭଜେ ll