ନିଶା

କେତେ ନାରୀର ସିନ୍ଦୁର ଲିଭିଛି

ହିସାବ ରଖିଛି କିଏ

ଯେଉଁ ନାରୀର ଘର ଉଜୁଡିଛି

ଜାଣିଥିବ ଏକା ସିଏ,

ସବୁ ସେଇ ନିଶାପାଇଁ,

ଥରେଯିଏ ତାର ପାଲରେ ପଡିଛି

ତାକୁ ଛାଡି ପାରିନାହିଁ ।

ଏଇ ନିଶାପାଇଁ ସ୍ତ୍ରୀ ଗଲା ଛାଡି

ଉଡ଼ିଗଲା ବିଲ ବାଡ଼ି

ଏଇ ନିଶାପାଇଁ ବାପ ପୁଅର

ଚାଲିଛି ବାଡ଼ିଆ ବାଡ଼ି,

ଟିକିଏ ହୋଇଲେ ଉଣା,

ମଦୁଆର ପାଦ ଇଞ୍ଚେ ଘୁଞ୍ଚେନାହିଁ

ଆପୁଲି ହୁଅଇ ବଣା ।

ନିଶାପାଇଁ ସ୍ୱାମୀ ସ୍ତ୍ରୀକୁ ଛାଡ଼ଇ

ବାପକୁ ଛାଡ଼ଇ ପୁଅ

ପେଟପାଇଁ ଏଠି ଇଜ୍ଜତ ବିକୁଛି

ଘରର ବଢ଼ିଲା ଝିଅ,

ଘରଣୀର ଶଙ୍ଖା ବିକି

ଗେରସ୍ତ ଯାଇଛି ମଦ ଭାଟିକି

ଫେରିବ ଅଧ ରାତିକି ।

ପାନ ବିଡ଼ି ବୋଲି ମଣିବ ନାହିଁ

ସିଏତ ରୋଗର ଖଣି

ଟିବି,କ୍ୟାନସର, ଶ୍ଵାସ ରୋଗରେ

ଟଙ୍କା ଦେଉଥିବ ଗଣି,

ଭୋଗିବ କର୍ମର ଫଳ,

ଦୁଆର ମୁହଁରେ ଯମ ଜଗିଥିବ

ନେବାକୁ ପୁରିଲେ କାଳ ।