ନୀଳାଦ୍ରି ବିଜେ

ଲୀଳାମୟ ତୁମେ

ରଥାରୂଢ ହୋଇ

ଯାଇଥିଲ ଚାଲି

ରତ୍ନବେଦୀରୁ ଜନ୍ମବେଦୀକୁ

ମାନବୀୟଳଲୀଳା ପାଇଁ l

ଶୂନ୍ଯଥିଲା ବଡଦେଉଳ

ଫାଙ୍କା ପଡିଥିଲା ଆନନ୍ଦ ବଜାର

ବାଇଶି ପାହାଚ ଝିରୁଥିଲା

ଖାଲି ଭକ୍ତଙ୍କ କୋଳାହଳ l

ଏମିତିରେ ଖାଲି

ଦ୍ୱାଦଶ ଦିବସ ଗଲା ବିତି

ଅପେକ୍ଷାର ହେଲା ଇତି

ଜନ୍ମବେଦୀରୁ ଲୀଳାଖେଳା ସାରି

ରତ୍ନବେଦୀକୁ ଫେରୁଛନ୍ତି ଆଜି

ପ୍ରଭୁ ଶ୍ରୀ ଜଗନ୍ନାଥ l

ପୁଣି ଚଳ ଚଞ୍ଚଳ ହେଲା

ବାଇଶି ପାହଚ,ଆନନ୍ଦ ବଜାର

ଭକ୍ତଙ୍କ ଗହଳିରେ l

ସବୁ ପ୍ରସ୍ତୁତି ଏବେ ଶେଷ

ବନ୍ଧା ହେଲା ଚାରମାଳ

ବାଜି ଉଠିଲା ବିଜେକାହାଳୀ

ସଂପୂର୍ଣ୍ଣ ହୋଇ ବନ୍ଦାପନା

ସହ ଡୋରିଲାଗି ନୀତି

ମହାପ୍ରଭୁଙ୍କ ଶ୍ରୀମସ୍ତକରେ

ଟାହିଆ ହେଲା ବନ୍ଧା l

କନକ ମୁଣ୍ଡିରେ ଚାନ୍ଦୁଆ

ଆଉ ରତ୍ନସିଂହାସନ ତଳେ

ଚାରମାଳ ସରିଲାଣି ବନ୍ଧା l

ଘଟ, ମର୍ଦ୍ଧଳ, ବନାଟି,ଛତ୍ରୀ,

ତରାସ, ଆଲଟ ଚାମର ସହ

ନୂତ୍ୟ ବାଦ୍ୟର ତାଳେ ତାଳେ

ଗୋଟି ପହଣ୍ଡିରେ

ପାହୁଣ୍ଡ ପାହୁଣ୍ଡ ପକାଇ

ସିଂହଦ୍ବାର ଅଭିମୁଖେ

ଚାଲିଛନ୍ତି ଶ୍ରୀ ଜଗନ୍ନାଥ l

ଅଭିମାନିନୀ ଲକ୍ଷ୍ମୀ ଠାକୁରାଣୀ

ପତିଙ୍କୁ ଘେରନ୍ତି ବାଟ,

ରସଗୋଲା ଖୁଆଇ

ମହାପ୍ରଭୁ କରନ୍ତି

ଲକ୍ଷ୍ମୀଙ୍କ ମାନଭଞ୍ଜନ l

ସରିଲା ଘସା, ବିଡିଆ ମଣୋହି

ରୁଦ୍ଧା କାର୍ଯ୍ୟ ହେଲା ଶେଷ

ଏବେ ଅନ୍ତିମ ପର୍ବରେ

ରତ୍ନସିଂହାସନେ ବିଜେକରି

ନୀଳାଦ୍ରି ବିଜୟ କଲେ

ମହାପ୍ରଭୁ ଶ୍ରୀ ଜଗନ୍ନାଥ l

ଧନ୍ୟ ପ୍ରଭୁ ତୁମେ

ଧନ୍ୟ ତୁମ ଲୀଳା

କି ଆଶ୍ଚର୍ଯ୍ୟ ଏ ପରିକଳ୍ପନା l

ଜୟ ଜଗନ୍ନାଥ l

********************

ପ୍ରଶାନ୍ତ କୁମାର ବେହେରା

ଅଧ୍ଯାପକ , ରାଜନୀତି ବିଜ୍ଞାନ ବିଭାଗ,

ସ୍ୱାମୀ ବିବେକାନନ୍ଦ ସ୍ମାରକ ସ୍ୱୟଂଶାସିତ ମହାବିଦ୍ୟାଳୟ,

ଜଗତସିଂହପୁର l

ଦୂରଭାଷ - ୯୪୩୭୧୩୫୯୧୬