ନିଦାଘ ଆସିଛି

ବସନ୍ତର ଅନ୍ତେ ଆସିଛି ନିଦାଘ

ଝାଞ୍ଜି ପବନ ନେଇ

ବେସୁରା ହେଲାଣି ତପ୍ତ ଧରଣୀ

ଗ୍ରୀଷ୍ମର ପ୍ରକୋପ ସହି ll

ଅଂଶୁଘାତର କରାଳ ସ୍ପର୍ଶରେ

କିଏବା ପଡୁଛି ଟଳି

ପ୍ରବଳ ତାପରେ କେତେବା ସମ୍ପତ୍ତି

କେଉଁଠି ଯାଉଛି ଜଳି ll

ବାଟୋଇ ବାପୁଡ଼ା ଅସହ୍ୟ ତାତିରେ

ଯାଏ ପଥ ଅତିକ୍ରମି

ଗମ ଗମ ଝାଳ ବହିପଡ଼େ ତାର

ମଥା ତାର ଯାଏ ଭ୍ରମି ll

ମନ ଖୋଜୁଥାଏ ସୁଶୀତଳ ଛାୟା

ଶୀତଳ ବାଆର ସ୍ପର୍ଶ

ଅସ୍ତଗାମୀ ରବି କିରଣ ପରଶେ

ମୁଖେ ଖେଳିଯାଏ ହସ ll

ପ୍ରବଳ ନିଦାଘ ଶୋଷି ନିଏ ଜଳ

ଶୁଷ୍କ ଧରିତ୍ରୀ ରାଣୀ

ପ୍ରାଣୀ ଜଗତଟି ତୃଷା ନିବାରଣେ

ଖୋଜି ଥାନ୍ତି ଟିକେ ପାଣି ll

ତଥାପି ଜଳର ଉତ୍ସ ଏ ନିଦାଘ

ପ୍ରକୃତିର ଆଶୀର୍ବାଦ

ନିଦାଘ ଶେଷରେ ବରଷା ଆସଇ

ଚପଳା କରଇ ଶବ୍ଦ ll

ଶୀତଳ ଜଳରେ ଭିଜାଏ ଧରଣୀ

ମେଣ୍ଟାଏ ସବୁରି ତୃଷା

ଏହି ପରି ସଦା ଯିବା ଓ ଆସିବା

ଲାଗି ଥାଏ ଖରା ବର୍ଷା ll