ନଦୀର ନାମ- ନାରୀ

ଇଭ୍ ହେଉ କି ଶତରୂପା- ନାରୀଟିଏ ଶତଧା ବିଭକ୍ତ ହୁଏ

କାମନା ଅଗ୍ନିରେ ଜଳି ପୁରୁଷର ପରିପୂର୍ଣ୍ଣ ମାତୃରୂପ ପାଏ ।

ଜନନୀ ଭଗିନୀ ଜାୟା କନ୍ୟା ସାଜେ ବଧୁରୂପ ନିଏ

ସବୁ ରୂପେ ମାତୃତ୍ବ ପ୍ରସରି ପୁରୁଷକୁ ପୂର୍ଣ୍ଣତା ସେ ଦିଏ ।

କୋଠିର ବାଇଜୀ କେବେ ସୋନାଗାଛିର ମନହାରିଣି

ବଣ୍ଡାନାରୀ ବାଳୁତକୁ ବରେ ବାର୍ଦ୍ଧକ୍ୟରେ ଦେବ ଭାତପାଣି !

କର୍ମ-ଜିବୀ ବିଚିତ୍ର ଜୀବନ ଚୁଲି ଚଟୁ ସାଥୀ ଛାଡେ ନାହିଁ

ଉପରିସ୍ଥ କ୍ଷମତା ପାଶର ବନ୍ଧନରୁ ମୁକ୍ତି ଅବା କାହିଁ !

ରାବଣର ମହନୀୟତାରେ ସୀତା ଦିଏ ଅଗନି ପରୀକ୍ଷା

ପାଂଚ ମହାବଳୀ ପତି ଥାଇ ଯାଜ୍ଞସେନୀ ହୁଏ ଭୁଲୁଣ୍ଠିତା ।

ଫୁଲଠୁ କୋମଳ ଫୁଲମତି ପତି ପାଇଁ ସାଜେ ବାରାଂଗନା

ଦେଶ ପାଇଁ ଆତ୍ମବଳି ଦିଏ ଯୁଦ୍ଧେ ଯୋଗ ଦିଏ ବୀରାଂଗନା। 

ନାରୀ ନୁହେଁ ସେତ ନାରାୟଣୀ ମହାବିଷ୍ନୁଙ୍କର ନାରୀ ରୂପ

ସବୁଘରେ ଅପହଂଚ ହେବେ ଜାଣି ବିଭୁ ହେଲେ ମାତୃକଳ୍ପ ।

ଝିଅ ବୋଝ ବାପ ବିଦା କରେ ବିପଦରେ ସେହି ସାହାପକ୍ଷ

ରାକ୍ଷୀ ମାନ ରଖେନାହିଁ ଭାଇ ଭଉଣୀ କି ହୁଅନ୍ତା ବିପକ୍ଷ !

ଅର୍ଦ୍ଧାଙ୍ଗିନୀ ଅର୍ଦ୍ଧଭୁକ୍ତ ରହେ ପତିକୁ ମାନି ପରମେଶ୍ଵର

ପାଚିକା ସେବିକା ପ୍ରେମିକା ହୁଏ ଭିନ୍ନ ଭିନ୍ନ ଅବତାର ।

କୋମଳାଙ୍ଗି ପୁଣି ଦୃଢମନା ବିବିଧତା ଆଭୁଷଣ ତା'ର

କର୍ମଜୀବି ପୁରୁଷ ସୁଲଭ ସୁଗୃହିଣୀ ସଜାଡେ ସଂସାର ।

ନଦୀ ନାରୀ - ପର ଉପକାର ପାଇଁ ଗଢା ଜୀବନ ତାଙ୍କର

ପୁରୁଷର ପରଶେ କଳଙ୍କ ଶିରେ ବହେ ବିଧାନ ବିଧିର ।