ନାୟିକା
ନାୟିକା
ମୁହଁରେ ଲଗାଇ ପ୍ରସାଧନୀ ଦ୍ରବ୍ୟ
ସାଜଇ କେବେ ସେ ବୀରା
ହାଥ ପାହାନ୍ତାରେ ଆକାଶଟା ଛିଡେ
ଧରା ଦିଏ ଚନ୍ଦ୍ର ତାରା ll 1
ଗରିବ ପେଟରେ ଦାନା ଗଣ୍ଡେ ପାଇଁ
ସାଜେ ତରୁଣୀ ନାୟିକା
ହୋଇଗଲେ ରାତି ଲୁଚାଏ ତା ଦେହ
ପିନ୍ଧି ସେ ଶାଢୀ ଦାମିକା ll 2
କେତେ ବେଳେ ରାଣୀ ରାଜକୁମାରୀ ସେ
କେବେ ଶିଳ୍ପପତି ଝିଅ
କେବେ ଆଧୁନିକା କୋଟିପତି ନାରୀ
କେବେ ଝରେ ଆଖି ଲୁହ ll 3
ଦର୍ଶକ ହସନ୍ତି ଭରିଯାଏ ପେଟ
ଦେଖି ଅଭିନୟ ତା'ର
କରୁଣ ଦୃଶ୍ୟରେ କୋହ ଫାଟିଯାଏ
ଝରାନ୍ତି କେ ଲୁହ ଧାର ll 4
ସାଜିଲେ ନାୟିକା ଅଜାଡି ହୁଅନ୍ତି
ନେତା ମନ୍ତ୍ରୀ ଧନୀ ପୁଅ
ମୁହେଁ ପାଉଡର ଲିଭିଗଲା ପରେ
ଛୁଟେନି କାହାର ସୁଅ ll 5
ରାତି ଗଲେ ପାହି ହୁଏ ଯେବେ ଦିନ
ବଦଳିଯାଏ ଠିକଣା
କିଏ ନାକ ଟେକେ ଯାତ୍ରାବାଲୀ କହି
କିଏବା କରନ୍ତି ଘୃଣା ll 6
ଜୀବନ ନାଟକ ସମୟ ମଞ୍ଚରେ
ଅଟେ ସିନା କଳାକାର
ସତ ମିଛ ଏଠି ଅଭିନୟ କରି
ପାଏ ଘୃଣା ପୁରସ୍କାର ll 7
ରଙ୍ଗ ଦୁନିଆର ଅନ୍ଧାରି ମୂଲକେ
ଥାଏ ସିନା ତା'ର ଭାଉ
ଖୋଲା ଏ ସଂସାରେ କିଏ ବା ତାହାକୁ
କରିବାକୁ ଚାହେଁ ବୋହୂ ll 8