ନାଇଁ ଫିକବ୍ ଭାତ୍

ଅଗଲ୍ଲା ଭାତ୍ କେ ଫିକି ଦଉଛୁ 

ବାସି ହେଇଗଲା କହି,

ଯା ଦେଖି ଆଏବୁ ଗରିବ୍ ଘର୍ କେ

ତାହାକେ ଥିସି ଚାହିଁ ।

ଗରିବ୍ ଲୋକ୍ କେ ଦେଇଦେବୁ ରେ

ନାଇଁ ଫିକବୁ ଭାତ୍,

ବଡା ପୁଇନ୍ ତୁଇଁ ଆରଜନ୍ କରବୁ

ଗରିବ୍ ନାଇ ମାରେ ଲାତ୍ l

ପଖାଲ୍ ମୁଠେ ଲାଗି କଲବଲ୍ ହେସି

ଇ ଖୁଲି ସେ ଖୁଲି ବୁଲି, 

କେତେବେଲେ କିଏ ଦେତାକାଏ ମୁଠେ

ବୁଲୁଥିସି ଗଲି ଗଲି ।

ଗରିବର୍ ମୁହେ ହସି ଭରିଦେବୁ

ଭାତ ମୁଠେ ଦେଇ,

ଅଜାନତ୍ ରେ ଯାହା ପାପ୍ କାମ୍ କରିଥିବୁ

ସବୁ ଯିବାରେ ଧୁଇ ।

ଭଗବାନ୍ ଲେଖେ ପୂଜା କରବା ତତେ

ଦେବାରେ ଆଶିର୍ବାଦ୍,

ତୋର୍ ଛୁଆ,ପିଲା,ପରିବାର୍ ବନେ ରହେବେ

ପାଏଲେ ତାର୍ ଆଶିର୍ବାଦ୍ ।

ଯେତ୍'କି ଖାଏବ ସେତକୀ ରାନ୍ଧବ୍

ନାଇଁ ଫିକବ୍ ଭାତ୍ କେହି,

ଭାତ୍ ମୁଠେର୍ ଲାଗି ସବୁ ନାଟକ୍ ଚାଲିଛେ

ଧନୀ ହେଉ କି ଗରିବ୍,ଦୁଖି ।