ମୁନା ଶୋଇଅଛି ନିଦେ

 ମୁନା ଶୋଇଅଛି ନିଘୋଡ଼ ନିଦରେ 

        ମାଆ କହୁଛନ୍ତି ଉଠରେ ବାବୁ 

 ଆଜି ଶନିବାର ସକାଳୁଆ ପଢ଼ା

        କେତେବେଳେ ବିଦ୍ୟାଳୟ କୁ ଯିବୁ l 

ପଲଙ୍କ ରେ ଶୋଇ କହୁଅଛି ମୁନା

         ମାଆ ଜମା ବ୍ୟସ୍ତ ହୁଅନା ଏବେ 

ଟିକେ ଶୋଇଦିଏ ଲାଗୁଅଛି ଭଲ 

         ବିଦ୍ୟାଳୟ ଡେରି ନ ହେବ କେବେ ?

ମାଆ କହୁଛନ୍ତି ଶୁଣ ବାବୁ ମୁନା  

           ଅଳସୁଆ ଜମା ନୁଁହେଟି ଭଲ 

ଠିକ ସମୟରେ ନ କରିଲେ କାମ 

            ସବୁ ହୋଇଯାଏ ଟି ଗୋଳମାଳ l 

ମୁନା ଶୁଣୁନାହିଁ ମାଆ ଙ୍କ ର କଥା 

            ଯେତେ ବୁଝେଇଲେ ଶୋଇଛି ରହି 

ବିଦ୍ୟାଳୟ ଘଣ୍ଟା ଵାଜିଗଲା ଶୁଣି 

             ଉଠିଭାବେ କଣ କରିବି ମୁହିଁ ?

ଅତି ହରବରେ ମାଆ କୁ କହଇ

            ମାଆ ଡେରି ହେଲା କରିବି କଣ 

ଗୁରୁଜୀ ଆଜିତ ଛାଡ଼ିବେନି ଜମା 

            ଦଣ୍ଡ ମୋ ପାଇଁ ଥୁଆଟି ଜାଣ ?

ମାଆ କହୁଛନ୍ତି ସତ କଥା ସବୁ 

         ଗୁରୁଜୀ ଙ୍କ ଆଗେ ଦେବୁ ଯେ କହି 

ମିଛ କହିବାଟା ଅଟେ ମହାପାପ

          ସେ କଥା ଜମା ରୁ ଭୁଲିବୁ ନାହିଁ l 

ଖାତାବହି ଧରି ମୁନା ପହଞ୍ଚିଲା

         ବିଦ୍ୟାଳୟ ହତା ଭିତରେ ଯାଇ 

ଗୁରୁଜୀ ଖେଳାନ୍ତି ଶନିବାରେ ଖେଳ 

        କହିଲେ ଏ ମୁନା ଥିଲା ଟି କାହିଁ ?

ମୁନା କହୁଅଛି ଶୋଇ ପଡ଼ିଥିଲି

        ଜାଣି ପାରିଲିନି ସମୟ ଜମା 

ତେଣୁ ଆସୁ ଆସୁ ହୋଇଗଲା ଡେରି 

     ଗୁରୁଜୀ କରନ୍ତୁ ମୋତେ ଯେ କ୍ଷମା l 

ଆଉ ଜମା କେବେ ଭୁଲ କରିବିନି 

       ହୋଇବିନି ଜମା ଯେ ଅଳସୁଆ 

ଠିକ ସମୟ ରେ କାମ ମୁଁ କରିବି 

        ମାନିବି ଯେ କଥା କହିବେ ମାଆ l 

ଶୁଣି ମୁନା କଥା ଗୁରୁଜୀ କହିଲେ 

        ଛାତ୍ର ଛାତ୍ରୀ ତୁମେ ସଭିଏଁ ଶୁଣ

ଠିକ ସମୟରେ ଠିକ କାମ କଲେ 

        ଜଣାପଡେ କା'ର କେମିତି ଗୁଣ l 

ତେଣୁ ସମୟ କୁ ସଦାବେଳେ ତୁମେ 

          ଦେଖି ଚାହିଁ କାର୍ଯ୍ୟ କରିବ ସଦା 

ଶୃଙ୍ଖଳିତ ତୁମ ଛାତ୍ର ଜୀବନ 

           ଅଳସୁଆ ଗୁଣ ତ୍ୟାଗ ସର୍ବଦା l 

ଗୁରୁଜୀ ଙ୍କ କଥା ଶୁଣି ମୁନା କହେ 

          ଶପଥ ଏ କଥା କରୁଛି ମୁହିଁ 

ଜମା ଅଳସୁଆ ନ ହେବି ମୁଁ କେବେ 

           କରିବି କାର୍ଯ୍ୟ ମନ ଲଗାଇ l