ମୁଁ ତୁମ ଫୁଲହାର

ମୁଁ ତୁମ ଫୁଲହାର

ପୂର୍ଣ୍ଣମୀ ଆକାଶେ ଜହ୍ନ ଗୋ ତୁମେ

ଉଆଁସ ନିଶିର ଉଦାସୀ କଇଁ,

ବୁକୁରେ ଖେଳାଅ ନବ ଉନ୍ମାଦନା

ତୁମ ପରଶରେ ଉଠିବି ଜୀଇଁ ।

ଲଳିତ କମଳ ନୟନରେ ତୁମ

ଅୟୁତ ଯୁଗର ତନ୍ଦ୍ରା ତ ମୁଁ,

ନିଶାର୍ଦ୍ଧରେ ଫୁଟି ସୁରଭି ବିତରି

ସାଜିବି ରଜନୀଗନ୍ଧା ମୁଁ ।

ନିର୍ଜନ ମୋର ମନ ଅଗଣାରେ

ତୁମେ ଅଟ ପ୍ରିୟ ମଧୁସ୍ମୃତି

ସେ ସ୍ମୃତିବନର ଅପରାଜିତା ମୁଁ

ପୀରତିରେ ତ ମଧୁମାଳତୀ ।

ସାତ ସାଧବର ରତ୍ନତରୀ ତୁମେ

ମରୁବୁକେ ଅଟେ ସାତସିନ୍ଧୁ

ସେ ସିନ୍ଧୁ ତୀରର କାଶତଣ୍ଡୀ ମୁଁ

କେବେ କିଆ ପୁଣି କେତକୀ ଗେଣ୍ଡୁ ।

ଶୀତୁଆ ସକାଳ ଦିବାକର ତୁମେ

ତୁମର ମୁଁ ତ ସୁରୁଜମୁଖୀ

ମଲ୍ଲୀ,ମାଳତୀ,ଚମ୍ପା ଓ ସେବତୀ

ପାଦରେ ଦେଇଣ ହେବିସୁଖୀ ।

ତୁମେ ମୋ ମନର ତମାଳ କୁଞ୍ଜରେ

ସତେ ମନୋହର ବେଣୁଧର

ବାହୁ ବନ୍ଧନରେ ନିଜକୁ ସମର୍ପି

ସାଜିବି ମୁଁ ତୁମ ଫୁଲହାର ।