ମୁଁ ଅନ୍ୟାୟୀ ନେତା ହେବି

ଦିନେ ଶିକ୍ଷକ ପଚାରିଲେ

କହିଲ ବଡ଼ ହେଲେ ସବୁ କଣ ହବ

ଡାକ୍ତର, ଇଞ୍ଜିନିୟର, ଓକିଲ,ଆଇଏଏସ,

ଶିକ୍ଷକ, ରେପୋର୍ଟର୍ ଆହୁରି ଅନେକ କିଛି

ମୁଁ ଏ ଗୋଲମାଲ ଭିତରେ ଚୁପ୍ ଥିଲି

କାରଣ ମୁଁ ଏସବୁ କିଛି ବି

ହେବାକୁ ଚାହୁଁ ନଥିଲି

ଶିକ୍ଷକ ମୋ ଉପରେ ଧ୍ୟାନ ଦେଇ

ପଚାରିଲେ କଣରେ ପୁରା ଚୁପଚାପ୍

ଖାଲି କଣ ଅଣ୍ଡା ଖାଇବାକୁ ଆସିଛୁ

ନା ବୁଲିବାକୁ ଆସିଛୁ

ସବୁ ପିଲାଙ୍କ ଆଖି ମୋ ଉପରେ ଥିଲା

ଏଥର ମୁଁ ମୋ ନିରବତା ଭାଙ୍ଗି ଦେଲି

ଆଉ କହିଲି ଅନ୍ୟାୟୀ ନେତାଟି ହେବି

ହସର ଗୋଟେ ଜୁଆର ଛୁଟିଲା

ଶିକ୍ଷକଙ୍କ ଆଖି କିନ୍ତୁ ଆଶ୍ଚର୍ଯ୍ୟରେ ବଡ଼ ବଡ଼ ହୋଇଥିଲା

ମୁଁ ଭାବିଲି ସବୁ ଏଥର ସରିଲା

ପିଠି ବୋଧେ ମୋର ଫାଟିଲା

କହିଲେ କଣ ପାଇଁ ହବୁ

ମୁଁ ବୁଝାଇ ଦେଲି

ନେତା ହେବି ଆଉ ଏମାନଙ୍କ ଉପରେ ହୁକୁମ୍ କରିବି

500କୋଟି ଟଙ୍କାର ଯୋଜନାରେ

100 କୋଟିର ଗୋଟେ ପୋଲ କରିବି

400 କୋଟିରୁ କିଛି ବାଣ୍ଟିକି ଖାଇବି

ଆଉ କିଛି ସେଇ ଇଞ୍ଜିନିୟରକୁ ଦେବି

କିଛି ଦିନ ପରେ ପୋଲ ଭାଙ୍ଗିବ

ଲୋକେ ଆହତ ହେବେ

ତାଙ୍କୁ ମୁଁ ଡାକ୍ତର ପାଖକୁ ପଠେଇ ଦେବି

ଆଉ ସହାନୁଭୂତିର କିଛି ରାଶି ଘୋଷଣା କରିଦେବି

ଆଉ କେହି କେଶ୍ କଲେ ଓକିଲ

ପାଖରେ କେଶ୍ ଲଢ଼ିଦେବି

କିଛି ଟଙ୍କା ଦେଇ ରିପୋର୍ଟର ବନ୍ଧୁଙ୍କୁ କିଣି ନେବି

ନହେଲେ ଟିକେ ଡରେଇ ଧମକାଇ ଦେବି

ହଁ କଳା କାମ ସବୁ କରିବି ହେଲେ

ଧଳା ଟୋପି ଆଉ ପଞ୍ଜାବୀରେ ଢାଙ୍କି ଦେବି

ଆଉ ପ୍ରତ୍ୟେକ ଭାଷଣରେ ଦେଶ ବିଷୟ ଛାଡ଼ି

ହିନ୍ଦୁ, ମୁସଲମାନ ଆଉ ପାକିସ୍ତାନ ବିଷୟରେ କହିଦେବି

କେବେ ଜୟ ଯବାନ, ଜୟ କିଶାନ ,ଜୟ ବିଜ୍ଞାନର

ନାରା ଦେଇ ମିଛରେ ମିଛରେ ଟିକେ କାନ୍ଦି ଯିବି

ପଦବୀର କମାଲରେ ଆଇଏଏସ ଅଫିସରକୁ ଚୁପ୍ କରିଦେବି

ଏଇ 10ଟାରୁ 4ଟା କିଏ ଚାକିରି କରିବ

ଆଉ ପୁଣି ଗୋଲାମ ସାଜିବ

ସେଥିପାଇଁ ମୁଁ ଅନ୍ୟାୟୀ ନେତାଟି ହେବି

ଏମାନେ ସବୁ ଚାକିରି କରନ୍ତୁ

ମୁଁ ଏମାନଙ୍କୁ ହୁକୁମ ଦେବି

ଭଲ ନେତା ନୁହଁ

ମୁଁ ଅନ୍ୟାୟୀ ନେତାଟି ହେବି।